Ադրբեջանա-ռուսական հարաբերությունները կառուցված են միմյանց ներքին գործերին չմիջամտելու սկզբունքների վրա․ Ադրբեջանի ԱԳՆ

Ադրբեջանա-ռուսական հարաբերությունները կառուցված են բարիդրացիության, հավասար երկխոսության, փոխադարձ հարգանքի և միմյանց ներքին գործերին չմիջամտելու սկզբունքների վրա, լրատվամիջոցներին տված հարցազրույցում ասել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն։

«Հայտնի է, որ հարաբերություններում գրեթե մեկ տարի տևած լարվածությունը պայմանավորված էր AZAL–ի ինքնաթիռի հետ կապված իրավիճակով... Մենք բազմիցս ընդգծել ենք, որ ակնկալում ենք ողբերգության լիարժեք և թափանցիկ հետաքննություն, մեղավորների բացահայտում և քրեական հետապնդում, ինչպես նաև փոխհատուցում տուժածներին: Այս քայլերը կարևոր են երկկողմ հարաբերություններում բացասական մթնոլորտը վերացնելու համար», - ասել է նա։

Հաջիզադեն ընդգծել է, որ Ադրբեջանի նախագահ Իլհամ Ալիևի և Ռուսաստանի նախագահ Վլադիմիր Պուտինի միջև Դուշանբեում ԱՊՀ գագաթնաժողովի շրջանակներում վերջերս կայացած հանդիպումը նշանակալի քայլ էր հարաբերությունների կարգավորման ուղղությամբ։