«Չորրորդ ինքնիշխանություն». Ոստիկանապետի «կոնտրոլից» դուրս մնացածները

Թերթը գրում է. ««ՉԻ» տեղեկություններով՝ այն բանից հետո, երբ ճանապարհային ոստիկանության բարեփոխումների շրջանակներում տեսանկարահանող սարքեր տեղադրվեցին Երեւանի փողոցներում, սկսեցին վարորդների՝ «փողի հավաքագրման» այլ մեխանիզմներ գործել: Բանն այն է, որ մի քանի օր է, ինչ վարորդներին սկսել են «տուգանել» ոչ թե ճանապարհային ոստիկանության աշխատակիցները, այլ ոստիկանության այլ ստորաբաժանումների ներկայացուցիչներ, որոնց լիազորություններից դուրս է վարորդներին կանգնեցնելն ու նրանց տուգանելու մասով «բազար սկսելը»:

Մեր տեղեկություններով՝ ՀՀ ոստիկանապետ Վլադիմիր Գասպարյանը որոշել է վերահսկողություն չսահմանել ուղեկցող հատուկ դասակի վրա: Ուղեկցող հատուկ դասակը, ժողովրդի լեզվով ասած, «սպեց զվոդ»-ն է, որի աշխատակիցները ուղեկցում են կառավարական ավտոմեքենաները: Եվ ահա այս ծառայության աշխատակիցները, կառավարական ավտոմեքենաները, Հայաստան ժամանած բարձրաստիճան պաշտոնյաներին ուղեկցելուց հետո, երեկոյան ժամերին դուրս են գալիս փող աշխատելու: Նրանք կանգնեցնում են վարորդներին, հայտարարում են, որ խախտում են արել, ապա այդ խախտումը չարձանագրելու համար անցնում են Հայաստանում ընդունված «ընթացակարգին»: Ի դեպ՝ այսպիսի ապօրինի գործունեություն են սկսել ծավալել նաեւ պարեկապահակային ծառայության աշխատակիցները, որոնք արտասահմանյան մակնիշի ավտոմեքենայով (դրանք միկրոավտոբուսի մեծության են) շրջում են քաղաքում եւ ուշ ժամերին սկսում են վարորդների շրջանում «ռեյդ» իրականացնել: Հուսանք, որ Երեւանի փողոցներում տեղադրված սարքերը կֆիքսեն նաեւ այս դրվագները»: