Ուորեն Բաֆեթը իր վերջին նամակն է գրել Berkshire Hathaway-ի բաժնետերերին

Ամերիկացի միլիարդատեր և աշխարհի ամենաազդեցիկ ներդրողներից մեկը՝ Ուորեն Բաֆեթը, հրապարակել է իր վերջին նամակը բաժնետերերին՝ որպես ներդրումային հսկա Berkshire Hathaway-ի ղեկավար, հաղորդում է ՌԻԱ Նովոստին։

Մայիսին Բաֆեթը հայտարարել է Berkshire Hathaway-ի գործադիր տնօրենի պաշտոնից մինչև 2025 թվականի վերջը հեռանալու մտադրության մասին։ Նա իր իրավահաջորդ է առաջարկել ընկերության ներկայիս փոխնախագահ Գրեգ Աբելին։

«Ես այլևս չեմ գրելու Berkshire-ի տարեկան հաշվետվությունը կամ անդադար չեմ խոսելու բաժնետերերի տարեկան ժողովում։ Ինչպես կասեին բրիտանացիները, ես «լռում եմ»», - գրել է Բաֆեթը իր հրաժեշտի նամակում։

Գործարարը նշել է, որ տարեվերջին ընկերության ղեկը կանցնի Աբելին, որին նա մաղթել է երկար և հաջողակ կարիերա։

Ավարտելով իր նամակը՝ միլիարդատերը մի քանի խորհուրդներ է տվել բաժնետերերին, այդ թվում՝ կոչ է արել նրանց չմտածել անցյալի սխալների մասին և նայել դեպի ապագա։

«Մեծությունը չի որոշվում հսկայական հարստությամբ, հռչակով կամ կառավարության իշխանությամբ։ Երբ դուք ինչ-որ կերպ օգնում եք ուրիշներին, դուք աշխարհը դարձնում եք ավելի լավ տեղ։ Բարությունը ոչինչ չարժե, բայց այն անգին է», - եզրափակել է Բաֆեթը։