Տարոն Մարգարյանը հանդիպել է ՀՀ-ում Իրանի դեսպանի հետ

Երևանի քաղաքապետ Տարոն Մարգարյանը հանդիպել է ՀՀ-ում Իրանի Իսլամական Հանրապետության արտակարգ և լիազոր դեսպան Սեյեդ Ալի Սաղաիյանի հետ:

Կարևորելով հայ-իրանական հարաբերությունների ներկա մակարդակը և երկկողմ գործընկերային կապերը՝ քաղաքապետ Տարոն Մարգարյանը նշել է, որ երկու երկրների տեղական ինքնակառավարման մարմինների միջև ձևավորվել է համագործակցության տևական փորձ, որը պետք է ավելի ընդլայնել ու ամրացնել գործնական ծրագրերի միջոցով:

«Երևանի քաղաքապետարանը համագործակցում է Սպահանի, Շիրազի, Թավրիզի, Թեհրանի քաղաքապետարանների հետ: Մենք պատրաստ ենք համագործակցել և համատեղ ծրագրեր քննարկել քաղաքային տնտեսության տարբեր ոլորտների հետ կապված՝ դրանով իսկ նպաստելով բարեկամական և համագործակցային կապերի ամրապնդմանը Երևանի և Իրանի տարբեր քաղաքների միջև»,-նշել է Տարոն Մարգարյանը:

Քաղաքապետը մասնավորապես ընդգծել է համագործակցության փորձը կանաչապատման ոլորտում և հույս հայտնել, որ ընթացիկ տարում այդ համագործակցությունը կշարունակվի:

Փոխանցելով Թեհրանի քաղաքապետի շնորհավորանքները Տարոն Մարգարյանի Երևանի քաղաքապետ ընտրվելու կապակցությամբ՝ դեսպանն ընդգծել է երկու երկրների պատմամշակութային ընդհանրությունները և կարևորել գործընկերային հարաբերությունների ընդլայնումն ու զարգացումը, ինչպես նաև փորձի փոխանակումը տրանսպորտի բեռնաթափման, աղբի վերամշակման և կանաչապատման ծրագրերի իրականացման մասով:

Դեսպան Սեյեդ Ալի Սաղաիյանը, կարևորելով զբոսաշրջության առկա ներուժն ու զարգացման հնարավորությունները, առաջարկել է գործակցության կոնկրետ ծրագրեր քննարկել, ինչպես նաև պատրաստակամություն է հայտնել իր կողմից աջակցել ու օժանդակել երկուստեք կապերի զարգացմանը:

Կողմերը պայմանավորվածություն են ձեռք բերել համատեղ աշխատանքային խումբ ձևավորել և քննարկել հետագա համագործակցության հետ կապված խնդիրներ: