Բաքվում ՌԴ դեսպանը կանչվել է Ադրբեջանի ԱԳՆ. նրան բողոքի նոտա է հանձնվել

Ադրբեջանում ՌԴ արտակարգ և լիազոր դեսպան Միխայիլ Եվդոկիմովը կանչվել է երկրի Արտաքին գործերի նախարարություն։ Ադրբեջանի ԱԳՆ-ից հայտնել են, որ նրան նոտա է փոխանցվել։

Հանդիպման ընթացքում կտրուկ բողոք է արտահայտվել այն փաստի կապակցությամբ, որ նոյեմբերի 14-ին ժամը 01:00-ի սահմաններում Ուկրաինայի մայրաքաղաք Կիևի վրա հրթիռային և անօդաչու թռչող սարքերի հարձակումների հետևանքով «Իսկանդեր» հրթիռներից մեկն ընկել է դեսպանատան տարածքում, ինչի կապակցությամբ դեսպանին նոտա է հանձնվել։ Նշվել է, որ վերջին պայթյունն ամբողջությամբ ոչնչացրել է դեսպանատան ցանկապատի մի մասը, վնասել կառույցները, ծառայողական մեքենաները, վարչական շենքը և դեսպանատան հյուպատոսական բաժինը, ինչպես նաև զգալի վնաս է հասցրել դիվանագիտական ​​​​ներկայացուցչության տարածքին: Բարեբախտաբար, զոհեր չեն գրանցվել։

Դեսպանին հիշեցրել են, որ նմանատիպ հրթիռային հարձակումներ, որոնք հակասում են միջազգային իրավունքի նորմերին և սկզբունքներին, տեղի են ունեցել նախկինում։ Մասնավորապես, 2022 թվականի մարտի 10-ին ավիահարվածի հետևանքով Խարկովում գտնվող Ադրբեջանի պատվավոր հյուպատոսության շենքին լուրջ վնաս է հասցվել, իսկ ծառայողական մեքենան անօգտագործելի է դարձել։ 2024 թվականի հունվարի 2-ին «Կինժալ» հրթիռով ռուսական ավիահարվածի հետևանքով դեսպանատան վարչական շենքից մոտավորապես 35 քայլ հեռավորության վրա առաջացել է մոտ 3 մետր տրամագծով խառնարան, հայտնաբերվել է չպայթած զինամթերք։

2025 թվականի օգոստոսի 28-ին էլ Ուկրաինայում Ադրբեջանի դեսպանատան շենքից շուրջ 50 մետր հեռավորության վրա ավիահարվածի հետևանքով վնասվել են դեսպանատան վարչական շենքը և հյուպատոսական բաժինը, դեսպանի նստավայրը, ինչպես նաև լուրջ վնաս է հասցվել դիվանագիտական ​​ներկայացուցչության տարածքին։

Բացի այդ, 2025 թվականի օգոստոսի 8-ին և 18-ին Օդեսայի մարզում գտնվող SOCAR նավթամբարի վրա անօդաչու թռչող սարքերի հարձակումների հետևանքով վիրավորվել են աշխատակիցներ, զգալի վնաս է հասցվել ենթակառուցվածքներին։
Հանդիպման ժամանակ ընդգծվել է, որ այս բոլոր փաստերը հարցեր են առաջացնում հրթիռային հարվածների նպատակային բնույթի վերաբերյալ։

Նշվել է նաև, որ ռուսական կողմին նախկինում պաշտոնական նոտաներով Ուկրաինայում Ադրբեջանի դիվանագիտական ​​առաքելությունների շենքերի կոորդինատները տրամադրվել են դեռևս 2022 թվականի ապրիլին։ Հաղորդվել է, որ կոորդինատները հաշվի կառնվեն Ռուսաստանի պաշտպանության նախարարության կողմից։

Հանդիպմանն ընդգծվել է, որ Ադրբեջանի դիվանագիտական ​​ներկայացուցչությունների վրա նման հարձակումներն անընդունելի են, և պահանջվել է ռուսական կողմից համապատասխան հետաքննություն անցկացնել՝ մանրամասն բացատրությամբ։