Զապորոժիեի ԱԷԿ-ում էլեկտրահաղորդման գիծը անջատվել է

Զապորոժիեի ատոմակայանում (ԶԱԷԿ) երկու էլեկտրահաղորդման գծերից մեկը՝ Դնեպրովսկայա գիծը, անջատվել է ավտոմատ պաշտպանության համակարգի ակտիվացման պատճառով: Այս մասին հայտնել է ատոմակայանի մամուլի ծառայությունը իր Telegram ալիքում ՝ ընդգծելով, որ սահմանված անվտանգության կանոնների խախտումներ չեն գրանցվել:

«Ավտոմատ պաշտպանության համակարգի ակտիվացման պատճառով անջատվել է Դնեպրովսկայա էլեկտրահաղորդման գիծը, որը Զապորոժիեի ատոմակայանի սեփական կարիքները բավարարող երկու գծերից մեկն է», - ասվում է հաղորդագրության մեջ։

Նշվում է նաև, որ Զապորոժիեի ԱԷԿ-ի սեփական էլեկտրաէներգիայի կարիքները ներկայումս բավարարվում են «Ֆեռոսպլավնայա-1» գծով։ Ատոմակայանի անձնակազմը անընդհատ հետևում է իրավիճակին. անվտանգության սահմանափակումների կամ շահագործման պայմանների խախտումներ չեն հայտնաբերվել, և ճառագայթման մակարդակը մնում է նորմայի սահմաններում։