Հայաստանի Հանրապետության սփյուռքի նախարար Հրանուշ Հակոբյանի շնորհակալական խոսքը

Հայաստանի Հանրապետության սփյուռքի նախարար Հրանուշ Հակոբյանի շնորհակալական խոսքը

Բոլոր ֆրանսիացիներին,

ֆրանսահայերին,

ֆրանսահայ կազմակերպությունների ղեկավարներին և անդամներին

Շնորհավորում եմ ֆրանսիացիներին, ֆրանսահայերին և առաջադեմ մարդկությանը Ֆրանսիայի Սենատի կողմից ընդունված այս պատմական որոշման առթիվ:

Հայ-ֆրանսիական բարձր մակարդակի հարաբերությունները, ֆրանսահայերի համախմբված, համառ և հետևողական պայքարը, ինչպես նաև Ֆրանսիայի Նախագահի հաստատակամությունն ու վճռականությունը պսակվեց փայլուն հաղթանակով:

Թուրքիայից եկող սպառնալիքները, վիրավորանքները չազդեցին Սենատի որոշման վրա: Իրավական և ժողովրդավարական պետության համար առաջնային են մարդու իրավունքները և մարդկության դեմ կատարված հանցագործություններն այլևս չկրկնվելու պահանջը:

Հայոց Ցեղասպանության մասին օրենքների, քաղաքական որոշումների ընդունումը մարդկության անվտանգ ապագայով շահագրգիռ, լայնախոհ և առաջադեմ պետությունների և ժողովուրդների գործն է:

Պատմական ճակատագիր և պատմական հիշողություն կրող հարյուր հազարավոր հայեր այսօր հպարտ են իրենց ֆրանսիական քաղաքացիությամբ:

Համոզված եմ, որ ֆրանսիական պետության օրինակը վարակիչ կդառնա եվրոպական մյուս երկրների համար: Աշխարհը մի օր Հայոց Ցեղասպանության համընդհանուր ճանաչման միջոցով պիտի ասի իր վճռական խոսքը' «Այլևս' երբե՛ք»:

Մենք հանձնառու ենք նախանձախնդրությամբ ուսումնասիրելու ֆրանսիական փորձը և այն տարածելու եվրոպական մյուս հայ համայնքներում:

Մերսի Ֆրանսիա,

Մերսի ֆրանսիական պառլամենտի անդամներ,

Մերսի սիրելի ֆրանսիացիներ և ֆրանսահայեր: