Հասմիկ Պողոսյանն ընդունել է ՀՀ-ում Լեհաստանի արտակարգ և լիազոր դեսպան Զդիսլավ Ռաչինսկուն

ՀՀ մշակույթի նախարար Հասմիկ Պողոսյանն հունվարի 24-ին ընդունել է ՀՀ-ում Լեհաստանի արտակարգ և լիազոր դեսպան Զդիսլավ Ռաչինսկուն:

Հանդիպման ընթացքում կողմերը քննարկեցին մշակույթի տարբեր ոլորտներում 2012 թ. իրականացվելիք համատեղ նախագծերը, որոնց շարքում առանձնանում էին Հայ գրատպության 500-ամյակին նվիրված ծրագրերը: Դեսպան Զդիսլավ Ռաչինսկին մասնավորապես առաջարկեց Երևանում կազմակերպել լեհ հեղինակների Հայաստանին նվիրված գրքերի ցուցահանդես, ինչը նախարար Հասմիկ Պողոսյանը հավանությամբ ընդունեց, առաջարկելով մասնակցել հայկական թեմատիկայով հրատարակությունների, նաև թարգմանական գրականությանը նվիրված երևանյան ցուցահանդեսներին, ինչպես նաև առանձին շնորհանդես-ցուցահանդեսով համատեղ ներկայացնել գրական, թարգմանչական և հրատարակչական նախաձեռնությունների արդյունքում ստեղծված լեհ և հայ այն հրատարակիչների գրական արտադրանքը, որը կնվիրվի գործընկեր երկրին, նրա մշակույթին ու պատմությանը: Նախարար Հասմիկ Պողոսյանն անդրադարձավ նաև Հայաստանում 2012 թ. կայանալիք «Գրական Տապան» նախագծին, որին մասնակցելու հրավիրեց Վարշավայի պետական համալսարանի պրոֆեսոր, Գրիգոր Նարեկացու գործերի լեհերեն թարգմանիչ Մարեկ Ստարովեյսկուն:

Լեհաստանում անցկացվելիք ծրագրերի վերաբերյալ նախարար Պողոսյանը դեսպանին հայտնեց, որ Հայաստանը այս տարի հատուկ հյուրի կարգավիճակով է մասնակցելու Վարշավայի գրքի ցուցահանդես- տոնավաճառին, և որ այժմ այդ ուղղությամբ տարվում են նախապատրաստական աշխատանքներ, մշակվում է Հայաստանի տաղավարի հայեցակարգը: Նախարարը նաև առաջարկեց Վարշավայի ազգային գրադարանում, ինչպես եվրոպական այլ երկրների ազգային գրադարաններում, կազմակերպել հայ հնատիպ գրքի ցուցահանդես' ներկայացնելով նաև Վարշավայի գրադարանի ֆոնդերում պահվող հնատիպ հայալեզու գրականությունը:

Դեսպան Զդիսլավ Ռաչինսկու առաջարկով կողմերն անդրադարձան նաև Լեհաստանում ընթացիկ տարվա ամռանն անցկացվելիք ազգագրական փառատոնին հայկական կողմի մասնակցության, ինչպես նաև Երևանում առաջին անգան լեհական ազգագրական երգի պարի համույթի ելույթների հնարավորության հարցին: Նա նախարարին տեղեկացրեց նաև Լվովում լեհ ճարտարապետ վերականգնողների կողմից հայկական պատմամշակութային հուշարձանում վերականգնողական աշխատանքների իրականացման մասին և ցանկություն հայտնեց Երևանում կազմակերպել գործընթացին նվիրված ցուցահանդես:

Հանդիպմանը քննարկվեցին տարածաշրջանային համերգային մի շարք այլ նախաձեռնություններ ևս, որոնց վերաբերյալ կողմերը կատարեցին երկուստեք ճշգրտումներ: