Հանդիպում ԱԺ մշտական հանձնաժողովում

Հունվարի 25-ին ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Հրայր Կարապետյանը հանդիպեց Կովկասում ՆԱՏՕ-ի փոխգործակցության նորանշանակ սպա պարոն Ուիլյամ Լահյունի հետ:

Քննարկվեցին Հայաստան-ՆԱՏՕ համագործակցության արդյունքներին ու հետագա անելիքներին առնչվող հարցեր:

Պարոն Կարապետյանը ներկայացրեց անհատական գործընկերության ծրագրով նախատեսված բարեփոխումների ընթացքը, այդ ուղղությամբ հանձնաժողովի կատարած օրենսդրական ու վերահսկողական աշխատանքները՝ բարձր գնահատելով ՆԱՏՕ-ի դերակատարությունը ՀՀ պաշտպանության ոլորտի բարեփոխումների ծրագրի իրականացման գործում: Մասնավորապես այս համագործակցության շրջանակներում նա կարեւորեց զինված ուժերի նկատմամբ հասարակական եւ խորհրդարանական վերահսկողության ակտիվացումը եւ առաջարկեց նույն հետեւողականությամբ կյանքի կոչել նաեւ կրթական ու փորձի փոխանակման նոր ծրագրեր:

Պարոն Ուիլյամ Լահյունը պատրաստակամություն հայտնեց աջակցել ցանկացած առաջարկի իրականացմանը, ինչը կարող է նպաստել ոլորտի բարեփոխումներին: Նա տեղեկացրեց, որ ՆԱՏՕ-ի կենտրոնակայանը շահագրգռված է սերտ հարաբերություններ հաստատել Հայաստանի խորհրդարանի ու քաղաքացիական հասարակության հետ' համոզված լինելով, որ զինված ուժերի նկատմամբ քաղաքացիական վերահսկողությունը ժողովրդավարության ամրապնդման կարեւորագույն գործոն է:

Հանդիպման ժամանակ քննարկվեցին Հայաստան-ՆԱՏՕ համագործակցությանն առնչվող այլ հարցեր եւս: