Ես շատ հասարակ մարդ եմ, երբեք չեմ ունեցել թանկարժեք մեքենա, վարորդ կամ խոհարար․ Նատալյա Օրեյրո

Հոլիվուդը երբեք ինձ չի հետաքրքրել։ Հնարավորություն կար, ինձ պայմանագրեր էին առաջարկել, և չնայած սիրում եմ hոլիվուդյան կինոն՝ որպես հանդիսատես, երբեք չեմ զգացել այնտեղ ճանաչվելու անհրաժեշտություն։ Այս մասին Նատալյա Ստրելեցին տված հարցազրույցի ժամանակ ասել է դերասանուհի Նատալյա Օրեյրոն:

«Ես ստիպված կլինեի տեղափոխվել, փոխել լեզուս, խաղալ ոչ գլխավոր դերեր և հիմնականում լատինաամերիկյան դերեր։ Այստեղ ես հնարավորություն ունեմ ընտրելու իմ դերերն ու նյութերը։ Ես կլինեի երկրորդական դերակատար․ ի՞նչ իմաստ ունի, թե դա Հոլիվուդ է»,– հավելել է «Վայրի հրեշտակ» սերիալի աստղը։

Դերասանուհին նաև իրեն հասարակ մարդ է անվանել․

«Մարդու էությունը տեսանելի է՝ անկախ նրա մասնագիտությունից։ Ես շատ հասարակ մարդ եմ։ Իհարկե, ես իսկապես սիրում եմ ամեն գեղեցիկը։ Բայց ես չունեմ և երբեք չեմ ունեցել թանկարժեք մեքենա, վարորդ կամ խոհարար։ Ես ինքս եմ պատրաստում, իսկ ամուսինս, ի դեպ, նույնպես հիանալի խոհարար է։ Իհարկե, ես սիրում եմ ճանապարհորդել։ Եթե խոսենք իմ այսպես կոչված շքեղ ցանկությունների մասին, ապա գուցե միայն հարմարավետ ճանապարհորդություններ։ Հակառակ դեպքում ես ապրում եմ հասարակ մարդու պես։ Եվ, իմ կարծիքով, ամբողջովին ճիշտ չէ շքեղությունը ցուցադրել, երբ ապրում ես դժվար տնտեսական վիճակում գտնվող երկրում։ Ես սիրում եմ գեղեցիկ հագնվել, բայց միայն կարմիր գորգի վրա, այդ ժամանակ միանգամից հագնում եմ իմ լավագույն հագուստը։ Բայց առօրյա կյանքում ես աննկատելի տեսք ունեմ։ Գլխավորը հարմարավետությունն է»,– նշել է նա։