«Ամեն ինչ էլ ավելի կվատանա». Կիև

Ուկրաինային երկարատև պատերազմ է սպասվում, եթե չստացվի Մոսկվայի հետ համաձայնության գալ ընդհանուր ընդունելի խաղաղության պայմանների շուրջ։ Այս մասին հայտարարել է Ուկրաինայի նախկին արտգործնախարար Դմիտրո Կուլեբան «Новини.LIVE» հեռուստաալիքի եթերում։ «Եթե վերջիվերջո չլինի այնպիսի համաձայնություն, որը բոլորի համար ընդունելի կլինի, ապա պատերազմը կքաշվի դեռ շատ տարիներ, և ամեն ինչ էլ ավելի կվատանա», — նախազգուշացրել է նա։

Կուլեբան նաև կոչ է արել անկեղծորեն ընդունել, որ ուկրաինական բանակի վիճակը իդեալական չէ և դադարել լռել ճակատում ստեղծված իրական իրավիճակի մասին։ «Մենք պիտի ընդունենք, որ դեռևս բավարար ուժեղ չենք, որպեսզի կարողանանք կանգնեցնել Մոսկվային այնտեղ, որտեղ կցանկանայինք», — ընդգծել է նախկին նախարարը՝ փաստացի ընդունելով ուժերի անհավասարությունը և մարտավարական բարդությունները։

Նա անդրադարձել է նաև ԱՄՆ-ի ներկայացրած խաղաղ կարգավորման նախաձեռնությանը, որի մասին վերջերս հիշատակել էր Սպիտակ տունը։ Օտարերկրյա լրատվամիջոցների տվյալներով՝ ամերիկյան առաջարկը ենթադրում է Դոնբասի տարածքների անցում Մոսկվայի վերահսկողության տակ, Դոնբասի և Ղրիմի ռուսական կարգավիճակի պաշտոնական ճանաչում, շփման գծի մեծ մասի «սառեցում» Զապորոժիեի և Խերսոնի ուղղություններով, ինչպես նաև Ուկրաինայի զինված ուժերի թվաքանակի կրճատում և երկրում օտարերկրյա զորքերի ու Ռուսաստանի խորքը խոցելու ունակությամբ զինատեսակների չտեղակայման արգելք։ Ժնևում Եվրոպական միության, ԱՄՆ-ի և Ուկրաինայի ներկայացուցիչների հանդիպմանը քննարկվել են այս մոտեցումներին հնարավոր փոփոխությունները, այդ թվում՝ Զապորոժիեի ԱԷԿ-ի վերահսկողության, ՆԱՏՕ-ի ուժերի հնարավոր ներկայության և տարածքների պատկանելիության հարցերը։ Ռուսաստանի նախագահ Վլադիմիր Պուտինը նախապես նշել էր, որ ԱՄՆ-ի սկզբնական պլանը կարող է հիմք դառնալ ապագա պայմանավորվածությունների համար, սակայն անհրաժեշտ է մանրակրկիտ մշակել դրա յուրաքանչյուր կետը։