Tesla-ն «ծիծաղելիորեն գերագնահատված» է․ 2008-ի ճգնաժամը կանխատեսած ներդրողը խաղադրույք է անում ընկերության անկման վրա

2008 թվականի ֆինանսական ճգնաժամը կանխատեսած հայտնի ներդրող Մայքլ Բյուռին հայտարարել է, որ Tesla-ի բաժնետոմսերը տարիներ շարունակ վաճառվում են իրական արժեքից անհամեմատ բարձր, իսկ ընկերության հիմնադիր Իլոն Մասկին նախատեսվող հսկայական փոխհատուցման փաթեթը միայն ավելի կխորացնի իրավիճակը։ Fortune-ի փոխանցմամբ՝ իր Cassandra Unchained բլոգում Բյուռին նշել է, որ ընկերությունն «ծիծաղելիորեն գերագնահատված» է և շարունակաբար նվազեցնում է ներդրողների մասնաբաժինը՝ աշխատակիցներին բաժնետոմսերով վճարելով, բայց չի իրականացնում հետգնումներ։

Բյուռին, ով համաշխարհային ճանաչում ստացավ ԱՄՆ հիփոթեքային փուչիկի պայթյունը նախապես կանխատեսելով և դարձավ Ադամ Մաքքեյի «The Big Short» ֆիլմի գլխավոր նախատիպը, այժմ համոզված է, որ տեխնոլոգիական ոլորտում նոր «պղպջակ» է ձևավորվում։ Նրա կարծիքով՝ Tesla-ի շուրջ ստեղծված «կուլտը» և Իլոն Մասկի մշտական ուղղություն փոխելը վտանգավոր ազդակ են շուկայի համար։ Նա հիշեցնում է, որ Մասքը կենտրոնացած էր էլեկտրամոբիլների վրա, հետո անցավ ինքնավար վարորդային համակարգերին, իսկ հիմա շեշտը դնում է ռոբոտատեխնիկայի վրա՝ փոփոխելով առաջնահերթությունները մրցակիցների հաջողություններից կախված։

Չնայած Բյուռիի քննադատություններին՝ վերլուծաբանների մեծ մասը շարունակում է խորհուրդ տալ պահել կամ գնել Tesla-ի և այլ տեխնոլոգիական ընկերությունների բաժնետոմսերը, սակայն սքեպտիցիզմը աճում է։ Այլ թեմաներում ներդրողը նաև մեղադրել է տեխնոլոգիական հսկաներին ֆինանսական հաշվետվությունների մանիպուլյացիաների մեջ՝ պնդելով, որ Nvidia-ն արհեստականորեն երկարացնում է իր չիպերի շահագործման ժամկետները՝ շահույթի կանխատեսումները բարձրացնելու համար։