Ուկրաինան կարող է ցավոտ զիջումների գնալ. Գերմանիայի ԱԳ նախարար Վադեֆուլ

Գերմանիայի արտաքին գործերի նախարար Յոհան Վադեֆուլը խոստովանել է, որ Ուկրաինան կարող է ստիպված լինել «ցավոտ զիջումների» գնալ Ռուսաստանի հետ հակամարտության կարգավորման գործընթացում: Նրա խոսքերը մեջբերել է Neue Osnabrücker Zeitung-ը։

Նրա խոսքով՝ խաղաղության գործընթացը չափազանց դժվար կլինի Ուկրաինայի համար և «կարող է ավարտվել հանրաքվեով»: Հանրապետության քաղաքացիները պետք է որոշեն, թե արդյոք կարող են ընդունել պայմանները, այդ թվում՝ տարածքային զիջումները։

«Դիվանագիտության խնդիրն է մշակել փոխզիջումներ, որոնց կարող են աջակցել հակամարտության երկու կողմերը: Վերջին հաշվով, սա միշտ կհանգեցնի ցավոտ զիջումների», - ասել է Վադեֆուլը։

Նախարարը նշել է, որ դիվանագիտության շնորհիվ՝ խաղաղության հնարավորությունները «երբեք ավելի մեծ չեն եղել, քան հիմա են»։