Պուտինը մերժեց Ռուսաստանի վերադարձը G8․ «Ի՞նչն է այնտեղ մեծ»

Ռուսաստանի նախագահ Վլադիմիր Պուտինը հայտարարել է, որ չի ցանկանում երկրի վերադարձը «Մեծ ութնյակ» ձևաչափ։ ՏԱՍՍ-ի փոխանցմամբ՝ նա հիշեցրել է, որ դեռ մինչև 2014 թվականի իրադարձությունները գրեթե դադարել էր մասնակցել այդ գագաթնաժողովներին, իսկ Ուկրաինայի ճգնաժամից հետո խումբը դարձավ «յոթնյակ»։ Պուտինը նաև հերքել է, որ այս հարցը քննարկվել է նրա և ԱՄՆ ներկայացուցիչների մոսկովյան հանդիպման ժամանակ։

Նախագահի խոսքով՝ G7-ի տնտեսական կշիռը տարեցտարի նվազում է «ինչպես շագրենի կաշին»։ Նա կասկածի տակ է առել խմբի «մեծության» ընկալումը՝ նշելով, որ անհասկանալի է, թե ինչու են այդ երկրները իրենց շարունակում ներկայացնել որպես «Մեծ յոթնյակ»։

Ավելի վաղ Պուտինը «շատ օգտակար» էր գնահատել իր հանդիպումը ԱՄՆ նախագահ Դոնալդ Թրամփի հատուկ բանագնաց Սթիվեն Ուիտկոֆի և նախագահի փեսա Ջարեդ Քուշների հետ։ Կրեմլում անցկացված հանդիպումը տևել էր մոտ հինգ ժամ, որի ընթացքում, ըստ Պուտինի, քննարկվել են մի շարք կարևոր հարցեր։