Pantone-ը հայտարարել է 2026 թվականի հիմնական գույնը․ Cloud Dancer՝ խաղաղության և նոր սկիզբների խորհրդանիշ

Միջազգային գունագիտական կենտրոնը՝ Pantone Color Institute, հայտարարել է 2026 թվականի գլխավոր գույնը։ Ըստ ինստիտուտի հաղորդագրության, տարվա գույն է ընտրվել 11-4201 Cloud Dancer համարը կրող «ամպային-սպիտակ» երանգը, որը որսում է թեթևության, հստակության և նոր սկիզբների գաղափարը։

Pantone-ի Գույնի ինստիտուտի տնօրեն Լեատրիս Էյսմանի խոսքով՝ Cloud Dancer-ը մարմնավորում է հասարակության խաղաղություն փնտրող տրամադրությունը և կոչ է անում վերագնահատել հանգստության ու հավասարակշռված մտորումների արժեքը։ Իսկ ինստիտուտի փոխնախագահ Լորի Փրեսմանը նշել է, որ գույնի ընտրությունը եղել է չափազանց զգույշ գործընթաց․ «Շատ պայծառ սպիտակն արդեն կկորցներ իր բնականությունն ու կդառնար սառն ու անշունչ, իսկ մենք որոնում էինք բնական ու նուրբ հավասարակշռություն»։

Նշենք, որ 2025 թվականի հիմնական գույնը դարձել էր 17-1230 Mocha Mousse-ի ջերմ շագանակագույն երանգը։ Pantone-ը տարվա գույնը սահմանում է 2000 թվականից և շարունակում է թողարկել իր միջազգային գունային ստանդարտների կատալոգները, որոնք լայնորեն օգտագործվում են դիզայնի, նորաձևության և արտադրական ոլորտներում։