Քաղաքական գործիչը մեղադրվում է բանակի վերաբերյալ կեղծ տեղեկություններ տարածելու մեջ

Ռուսաստանի իրավապահ մարմինները քրեական գործ են հարուցել «Յաբլոկո» կուսակցության փոխնախագահ Լև Շլոսբերգի դեմ՝ Ռուսաստանի զինված ուժերի մասին կեղծ տեղեկություններ տարածելու մեղադրանքով։ Ինչպես հայտնում է Պսկովի մարզի դատարանների միացյալ մամլո ծառայությունը, Շլոսբերգը ճանաչված է որպես օտարերկրյա գործակալ, իսկ գործը վերաբերում է հրապարակային ապատեղեկատվության տարածմանը բանակի գործողությունների վերաբերյալ։

Դեկտեմբերի 5-ին դատարանը քննելու է քաղաքական գործչին կալանավորելու հարցը։ Նրա նկատմամբ կիրառվել է Ռուսաստանի քրեական օրենսգրքի 207.3-րդ հոդվածի 2-րդ մասի «դ» կետը, որը նախատեսում է պատասխանատվություն՝ քաղաքական, գաղափարական, ազգային, ռասայական կամ սոցիալական ատելության շարժառիթներով կեղծ տեղեկատվության տարածման համար։

Ավելի վաղ Շլոսբերգը դատապարտվել էր 420 ժամ պարտադիր աշխատանքի՝ իբրև օտարերկրյա գործակալի պարտավորությունները չկատարելու համար։ Բացի դրանից, նա այժմ գտնվում է տնային կալանքի տակ՝ Ռուսաստանի բանակի դիսկրեդիտացիայի գործի շրջանակում, որը հարուցվել է Ուկրաինայում հրադադարի թեմայով պատմաբան Յուրի Պիվովարովի հետ անցկացված քննարկումներից հետո, գրում է Lenta.ru-ն։