Չեմ ստանձնել դեր, որն ինձ «վերապահել են»․ Արփինե Հովհաննիսյան

ՀՀ արդարադատության նախկին նախարար Արփինե Հովհաննիսյանը Ֆեյսբուքի իր էջում գրառում է կատարել՝ շնորհակալություն հայտնելով ծննդյան տարեդարձի առթիվ շնորհավորանքների համար։

 

Նա, մասնավորապես, գրել է․

 

«Կյանքի տարբեր փուլերում յուրաքանչյուրն առերեսվում է տարբեր խնդիրների ու բարդությունների, դրանք լուծում իր պատկերացումների, սկզբունքների ու արժեհամակարգի շրջանակներում: Այդ փուլերից յուրաքանչյուրը իր հետքն է թողում մարդու վրա, մի որևէ հատկանիշ ավելացնելով կամ պակասեցնելով` դրական կամ բացասական: Մի որոշակի ժամանակահատված անց մարդը դառնում է իր անցած ճանապարհի ընթացքում իր կատարած տարբեր ընտրությունների հայելային արտացոլանքը: Մարդն այն է` ինչ ինքը երբևէ ընտրել է: Յուրաքանչյուր որոշում ընտրություն է: Յուրաքանչյուր ընտրություն հետք է:

 

Ծննդյանս օրվա կապակցությամբ ձեզնից յուրաքանչյուրի խոսքերը, ես գնահատում եմ նաև որպես տարբեր ժամանակներում իմ կատարած այս կամ այն որոշման, այս կամ այն ընտրության գնահատական: Դա էլ ձեր ընտրությունն է: Ուրեմն դուք արժանի եք համարել այդ խոսքերն ինձ ասել: Իսկ դա ծայրահեղ պարտավորեցնող է:

 

Ես էլ իմ հերթին շարունակում եմ կատարել ընտրություն` ամեն անգամ ինձ էլ ավելի ազատ զգալով:

 

Ինձ համար չափազանց կարևոր է, որ իմ կյանքի տարբեր փուլերում ես իմ ընտրած տեղն ու «դերն եմ» զբաղեցրել: Փորձել եմ լինել ու կամ այն ինչ ԵՄ: Չեմ ստանձնել դեր, որն ինձ «վերապահել են»: Փորձել եմ չլինել, նա, ով Չեմ: Դրանք ծանրագույն ընտրություններ են, բայց դրանք են ինձնից կերտել նրան, ՈՎ եմ: Ու ձեզնից յուրաքանչյուրը, ով կա իմ կյանքում` «ընկեր Հովհաննիսյան ջան շնորհավոր....» գրող ուսանողից, մինչև « ցավդ տանեմ շնորհավոր» գրողներ, ծանոթ ու անծանոթ մարդիկ, հարազատներ ու ընկերներ, դուք լավագույն ապացույցն եք իմ կատարած ընտրությունների:

 

Ու այսօր ազատ եմ շփվել այն մարդկանց հետ, ում հետ ցանկանում եմ: Եվ չշփվել նրանց հետ, ում հետ չեմ ցանկանում: Վայելել այն, ինչ կամ ում ունեմ, նաև այն կամ նրանց, ինչը կամ ում չունեմ, քանզի կա՜մ նրանք իմը չեն, կա՜մ դեռ իմը չեն: Ամենամեծ դասը, որ քաղել եմ, ամենամեծ հավատամքը, որ ունեմ հետևյալն է` կյանքի հատկապես սրընթաց այս օրերում, երբ ամեն բան գնվում ու վաճառվում է, երբ «հեղինակություններ» են չքանում, արժեքներ անէանում, երբեք ՉԶԵՂՉԵԼ մարդկային հարաբերությունները: Պահպանել ու փայփայել:

 

Շնորհակալ եմ: Աստված պահապան բոլորիդ ընտանիքներին»: