«Այլմոլորակային նավը» տարօրինակ վարքագծով գրավել է համաշխարհային ուշադրությունը

3I/ATLAS միջաստղային օբյեկտի տարօրինակ վարքագիծը, որը լրատվամիջոցներում երբեմն անվանում են «այլմոլորակային նավ», համաշխարհային հետաքրքրություն է առաջացրել, գրում է Daily Star-ը։

Պարբերականի տվյալներով՝ վերջին շաբաթներին շատ երկրներում մոլորակի պաշտպանության լայնածավալ վարժանքներ են անցկացվել։ Եվրոպական տիեզերական գործակալությունն ակտիվացրել է իր ամբողջ մոլորակային պաշտպանության համակարգը, Ճապոնիան անցկացրել է արագացված վարժանքներ, իսկ ԱՄՆ տիեզերական ուժերը մշակել են բարձր ուղեծրում գտնվող օբյեկտներին հետևելու հմտությունները։ Ավստրալիան, Հարավային Կորեան և Բրազիլիան ևս մասնակցում են համատեղ վարժանքներին։

Հոդվածում նշվում է, որ վարժանքները ներառում են «ոչ գրավիտացիոն արագացմամբ բարձր արագությամբ օբյեկտներ» վերլուծելու համակարգեր, որոնք հոդվածի հեղինակը վերագրում է հատկապես 3I/ATLAS-ին։ Գիտնականները օբյեկտի շուրջ անսովոր երևույթներ, մասնավորապես՝ շիթային արտանետումներ և «հակապոչեր» (փոշու մեծ չափերով մասնիկներից կազմված և իրենց զանգվածի և չափի պատճառով արեգակնային քամու ազդեցությանն ավելի քիչ ենթարկվող և գիսաստղի ուղեծրի հարթության մեջ մնացող սկավառակձև մարմիններ -խմբ.), անհասկանալի բաբախումներ և գրավիտացիոն մոդելներին չհամապատասխանող կայուն արագացում են գրանցել։

3I/ATLAS-ը հայտնաբերվել է 2025 թվականի հուլիսի 1-ին և նույնականացվել է որպես մեկ այլ աստղային համակարգի գիսաստղ՝ մոտավորապես 24 կիլոմետր տրամագծով կոմայով։ Մոդելները օբյեկտի տարիքը գնահատում են ավելի քան 7,5 միլիարդ տարի, ինչը այն դարձնում է մոտավորապես երեք միլիարդ տարով ավելի մեծ, քան Արեգակը։ Օգոստոսին Հարվարդի աստղաֆիզիկոս Ավի Լոեբը հայտնել  է, որ 3I/ATLAS-ը արձակում է իր սեփական լույսը, նման ավտոմեքենաների լուսարձակներին, և մեկ ամիս անց օբյեկտը սկսել է փոխել գույնը՝ ցույց տալով «անոմալ էվոլյուցիա»։