Մենք տպավորված ենք նման արձագանքով. Հայաստանում Ֆրասնիայի դեսպանատան առաջին քարտուղար

Հունվարի 25-ին ԱԻՆ աշխատակազմի ղեկավար Համլետ Հակոբյանն ընդունեց Վրաստանում Ֆրանսիայի Հանրապետության դեսպանատան անվտանգության հարցերով կցորդ պարոն Ստեֆան Ռոպերին և Հայաստանում Ֆրասնիայի դեսպանատան առաջին քարտուղար տիկին Գինելին։
ԱԻՆ աշխատակազմի ղեկավարը, ողջունելով հյուրերին, շնորհակալություն հայտնեց Ֆրանսիայի Սենատի կողմից Հայոց ցեղասպանության ժխտումը քրեականացնող օրինագծի ընդունման համար։
Տիկին Գինելը նշեց, որ Ֆրանսիայի դեսպանությունում հետևել են Սենատում ծավալված քննարկումներին, որոնց սկիզբը դրվել էր դեռևս անցյալ տարվա դեկտեմբերին։ «Սենատի ընդունած որոշումը 2001 թվականին Ֆրանսիայի կողմից Հայոց Ցեղասպանության ճանաչման մասին օրենքի տրամաբանական շարունակությունն է:

Արդեն երկու օր է, ինչ դեսպանատանն անդադար շնորհակալական գրություններ են ստացվում, մենք տպավորված ենք նման արձագանքով», - նշեց դեսպանատան առաջին քարտուղարը։
Քննարկվեցին Հայաստան-ֆրանսիա համագործակցության հիմնական ուղղությունները, ՀՀ-ում Ֆրանսիայի դեսպանատան աշխատակիցների և ֆրանսիական համայնքի անվտանգության հիմնախնդիրները։ 
Անդրադարձ կատարվեց ՀՀ ԱԻ նախարար Արմեն Երիցյանի Ֆրանսիա կատարած աշխատանքային այցին և ձեռք բերված պայմանավորվածություններին։ Շատ շուտով Հայաստան կժամանեն Ֆրանսիայի քաղպաշտպանության դեպարտամենտի երկու բարձրաստիճան սպաներ, ու համագործակցության ոլորտներն առավել հստակ ու որոշակի կլինեն։

Պայմանավորվածություն ձեռք բերվեց համատեղ ուսումնավարժությունների և դասընթացների անցկացման, տարբեր արտակարգ իրավիճակներում գործողությունների ու տարհանման պլաններ մշակելու մասին։