ԱՄՆ-ում քննադատել են Ուկրաինայի հարցով բանակցություններին Թրամփի մոտեցումը

Ուկրաինայում հակամարտության կարգավորման շուրջ հանդիպումները պետք է վարի Վաշինգտոնը ներկայացնող մեկ անձ, քանի որ դա թույլ կտար խուսափել ամերիկյան դիրքորոշման հակասություններից: Այս մասին հայտարարել է ԱՄՆ պետքարտուղարի նախկին խորհրդական Ռիչարդ Հաասը, փոխանցում է Politico-ն։

Հաասի խոսքով՝ Ուկրաինայի հարցով մի քանի մարդկանց կողմից միմյանցից անկախ բանակցություններ վարելը ԱՄՆ նախագահ Դոնալդ Թրամփի «վտանգավոր» որոշումն է: Նա լավագույն տարբերակ է համարել ընտրել մեկ ներկայացուցիչ, որը «տեղյակ է ամեն ինչից, կապի մեջ է բոլոր կողմերի հետ, սահմանում է ԱՄՆ դիրքորոշումը և ղեկավարում է փոխզիջումները»։

«Երբ խոհանոցում շատ խոհարարներ կան, անհնար է երաշխավորել, որ այն, ինչ ասվում է Ուկրաինայում, համապատասխանում է նրան, ինչ ասվում է Եվրոպայում, և այն, ինչ ասվում է Եվրոպայում, համապատասխանում է նրան, ինչ ասվում է Ռուսաստանի», - հայտնել է Պետքարտուղարության նախկին խորհրդականը։