Ռուսաստանի խոշոր Chery դիլերը սնանկացել է՝ դատարանում պարտվելով դեֆեկտեվ Tiggo 4 գնած հաճախորդին

Ռյազանում Chery-ի ամենախոշոր պաշտոնական դիլերներից մեկը հայտնվել է սնանկացման եզրին՝ դատարանում պարտվելով նոր Chery Tiggo 4 crossover-ի գնորդին։ Mash-ի փոխանցմամբ՝ մեքենան, որի արժեքը գնումի պահին կազմում էր 2 միլիոն ռուբլի, ընդամենը երկու շաբաթ անց սկսել էր կորցնել ներկը․ թափքի վրա առաջացել էին լայնամասշտաբ շերտազատումներ։ Դիլերը սկզբում կատարել էր երաշխիքային վերանորոգում, սակայն նույն խնդիրը կարճ ժամանակ անց կրկին կրկնվել էր։

Ըստ օրենքի՝ եթե արտադրողի մեղքով մեկևնույն խափանումը կրկնվում է, գնորդը կարող է վերադարձնել մեքենան և պահանջել վճարված ամբողջ գումարը, սակայն դիլերը հրաժարվել էր կամավոր կարգով վերադարձնել գումարը։ Դրան հաջորդել էր դատական գործընթաց, որի ընթացքում գնորդի նկատմամբ, ըստ հրապարակման, փորձել էին ճնշում գործադրել՝ անհայտ անձինք հայտնվել էին նրա տան մոտ ու փորձել «զրույցի նստել»։ Սակայն սպառնալիքները արդյունք չէին տվել, և դատարանը որոշում էր կայացրել հօգուտ մեքենայի սեփականատիրոջ։

Դատարանը պարտադրել էր դիլերին վերադարձնել ոչ միայն մեքենայի արժեքը, այլև վճարել զգալի տույժեր, ինչի արդյունքում ընդհանուր գումարը հասել էր 55 միլիոն ռուբլու։ Քանի որ դիլերական կենտրոնի տարեկան պաշտոնական շահույթը կազմում էր մոտ 2,16 միլիոն ռուբլի, վճարման այս չափաբաժինը դարձել էր անհնար։ Ընկերությունը դիմել է դատարան՝ հայտարարելով սեփական սնանկացումը, իսկ Գլխավոր դատախազությունը սկսել է ուսումնասիրել դեպքի հանգամանքները։