Ճապոնիայում 7.2 մագնիտուդ հզորությամբ երկրաշարժից հետո հայտարարվել է ցունամիի վտանգ

Ճապոնիայում գրանցվել է 7.2 մագնիտուդ հզորությամբ երկրաշարժ, ինչի հետևանքով երկրի գլխավոր մետեոռոլոգիական վարչությունը հայտարարել է ցունամիի սպառնալիք։ Ստորգետնյա ցնցումները ֆիքսվել են Աոմորի պրեֆեկտուրայի արևելյան ափի մոտ՝ 50 կիլոմետր խորությամբ, հաղորդում են տեղական աղբյուրները։

Վարչության տվյալներով՝ երկրի հյուսիսարևելյան ափերին ալիքների բարձրությունը կարող է հասնել մինչև երեք մետրի, իսկ բնակչությանը հորդորել են հեռու մնալ ծովափերից և պատրաստ լինել հնարավոր տարհանման։ Մինչ այդ, Կամչատկայի թերակղզու հարավարևելյան հատվածում գրանցվել էր 6.0 մագնիտուդ ուժգնությամբ հետցնցում՝ կապված հուլիսի 30-ին տեղի ունեցած ուժեղ երկրաշարժի հետ։ Այնտեղի մի հիվանդանոցում ժամանակավորապես խախտվել էր ջեռուցման համակարգը, սակայն արդեն վերականգնվել է։

Ճապոնիայի սեյսմոլոգները զգուշացնում են, որ նման ուժգնությամբ ցնցումները կարող են առաջ բերել նոր հետցնցումներ և բարձրացնել ռիսկերը որոշ տարածաշրջաններում։ Տեղական իշխանությունները շարունակում են վերահսկել իրավիճակը և պատրաստ են գործարկել արտակարգ արձագանքման համակարգերը։