Գերմանիայում ՀՀ քաղաքացի է ձերբակալվել՝ լրտեսության մեղադրանքով․ DW

Երեքշաբթի՝ դեկտեմբերի 9-ին, Ֆրանկֆուրտի Բարձրագույն շրջանային դատարանում մեկնարկել է երեք տղամարդկանց դատավարությունը, որոնք, ըստ մեղադրողների, ներգրավված են եղել Ռուսաստանի օգտին լրտեսության մեջ, հաղորդում է Deutsche Welle-ն։

Նրանց մեղադրանք է առաջադրվել նրա համար, որ «աշխատել են ռուսական հատուկ ծառայությունների համար»։ Ենթադրյալ գործակալները, հավանաբար, ծրագրել են սպանել ինչ–որ մեկին, հայտարարել է Դաշնային դատախազության խոսնակը՝ մեղադրական եզրակացությունը կարդալիս։

Մեղադրյալներ Վարդգես Ի.-ն, Ռոբերտ Ա.-ն և Արման Ս.-ն համապատասխանաբար Հայաստանի, Ուկրաինայի և Ռուսաստանի քաղաքացիներ են: Երեքն էլ ձերբակալվել են հունիսի 19-ին: Գերմանիայի գլխավոր դատախազի գրասենյակի հայտարարության մեջ նշվում է, որ մեղադրյալները Գերմանիա են ժամանել օտարերկրյա հետախուզական ծառայության կարգադրությամբ՝ «տեղեկություն հավաքելու այստեղ գտնվող Ուկրաինայից ժամանած անձի մասին»: Ձերբակալության օրը նրանք հսկելիս են եղել Մայնի Ֆրանկֆուրտում գտնվող մի սրճարան, որտեղ պետք է ժամաներ այդ անձը:

Ըստ մեղադրանքի՝ 43-ամյա Վարդգես Ի.-ն 2024 թվականի մայիսին ռուսական հետախուզությունից ստացել է հանձնարարություն՝ լրտեսելու Գերմանիայում բնակվող «մի ուկրաինացու»։ Պատերազմի սկսվելուց հետո այդ անձը կռվել է Ուկրաինայի զինված ուժերում։ Ռուսաստանը, նրան մեղադրելով «ռազմական հանցագործությունների» մեջ, այդ թվում՝ գերի վերցված ռուս զինվորների մահապատժին ենթադրյալ մասնակցության մեջ, «հանձնարարություն» է տվել է մի ՀՀ քաղաքացու։ Այս հանձնարարությունը կատարելու համար մեղադրյալը, ըստ դատարանի փաստաթղթերի, հավաքագրել է երկու հանցակից։ 2024 թվականի հունիսին ուկրաինացի տղամարդը կեղծ պատրվակներով հրավիրվել է Ֆրանկֆուրտի սրճարաններից մեկը, որտեղ մեղադրյալները պետք է ստանային նրա մասին «ավելի մանրամասն տեղեկություններ»։ Սակայն, նախկին զինվորը նախապես կապ է հաստատել գերմանական ոստիկանության հետ, և գործողությունը խափանվել է, պարզաբանում է մեղադրական կողմը։ Այդ տղամարդու նկատմամբ հետաքննություն է ընթանում նաև Գերմանիայում, հաղորդում է dpa լրատվական գործակալությունը։

Դատարանում ներկայացված տեղեկության համաձայն՝ այս լրտեսությունը, հավանաբար, նախատեսված է եղել որպես նախապատրաստություն Գերմանիայում ռուսական հետախուզական ծառայությունների հետագա գործողությունների, այդ թվում՝ սպանության համար։ Մեղադրյալները ձերբակալությունից ի վեր գտնվում են նախնական կալանքի տակ։

Հայաստանի քաղաքացի Վարդգես Ի.-ի և Ուկրաինայի քաղաքացի Ռոբերտ Ա.-ի փաստաբանները դատարանում հերքել են մեղադրանքները։