«Գրանիշ Offline»

«Գրանիշ» գրական ակումբի և «Անտարես» հրատարակչության համագործակցությամբ լույս է տեսել «Գրանիշ» գրական ամսագրի երկրորդ համարը, որ կրում է «Գրանիշ Offline–թե ինչպես հայերեն անցանց գրական իրականությունը կապ չունի առցանց գրական իրականության հետ» խորագիրը։ Այսօր Ազգային գրադարանում տեղի ունեցավ նոր համարի և granish.org կայքի շնորհանդեսը։ 

«Գրանիշ» գրական հիմնադրամը, որի հոգաբարձուների խորհրդի անդամներն են Կարեն Անտաշյանը, Արքմենիկ Նիկողոսյանը, Հասմիկ Հակոբյանը, Արամ Պաչյանն ու Աշոտ Գաբրիելյանը, իր առաջ դրել է բազմաթիվ նպատակներ, որոնցից մեկն էլ գրականության հանդեպ հասարակության կարծիքի բարեշրջումն ու հայ և հայալեզու գրականության տարածումն է։ Հիմնադրամն ունի մի շարք նախագծեր, որոնցից են «Գրանիշ» գրական ակումբն իր granish.org կայքով և «Գրանիշ» գրական ամսագիրը։

«Վերջին տարիներին գրող–ընթերցող հարաբերությունները խզված են, և մենք այդ ուղղությամբ մեծ աշխատանք ենք կատարել։ Կարող եմ ասել, որ գրական դաշտում ինչ–որ բան ենք տեղաշարժել՝ գրողի և ընթերցողի միջև ստեղծելով շփման նոր կուլտուրա»,–ասաց Արքմենիկ Նիկողոսյանը։

«Գրանիշ» գրական ակումբի անդամ Կարեն Անտաշյանը ներկայացրեց կայքը, նրա բաժիններն ու գործունեությունը։

Ինչպես և «Գրանիշի» առաջին համարի լույս տեսնելուց առաջ խոստացել էր խմբագրական կազմը, ամսագրի համարները թեմատիկ են։ Ամսագրի առաջին համարը, որը կոչվում էր «Գրանիշ լեզվանի–թե ինչպես լեզուն ստեղծեց գրականություն և գրականությունը ստեղծեց լեզու», նվիրված էր գրականություն–լեզու փոխհարաբերությանը, ներկայացնում էր արդի հայ գրականության մեջ տարբեր լեզվաշերտերի իրացումներ և ժամանակակից արտասահմանյան գրողների թարգմանություններ։

Խմբագրական կազմի անդամ, գրականագետ Արքմենիկ Նիկողոսյանի բնութագրմամբ՝ երկրորդ համարը՝ «Գրանիշ Offline»–ը, հիմնականում ընդգրկում է այն ժամանակակից հայ հեղինակների ստեղծագործությունները, ովքեր ակտիվ ներկայացված չեն համացանցում։ Գրականագետի բնորոշմամբ՝ բազմաթիվ իսկական գրողներ, որոնց ստեղծագործություններն արժեք են ներկայացնում, սակայն հեղինակները չկան սոցիալական ցանցերում, չունեն բլոգներ կամ այնպիսի մարդիկ, ովքեր ակտիվորեն կզբաղվեին նրանց ստեղծագործությունները համացանցային տարբեր հարթակներում տարածելով, դուրս են մնում առցանց քննարկումներից կամ կորչում տեսադաշտից։

«Վերջին տարիներին գրող–ընթերցող հարաբերությունները խզված են, և մենք այդ ուղղությամբ մեծ աշխատանք ենք կատարել։ Կարող եմ ասել, որ գրական դաշտում ինչ–որ բան ենք տեղաշարժել՝ գրողի և ընթերցողի միջև ստեղծելով շփման նոր կուլտուրա»,–ասաց Արքմենիկ Նիկողոսյանը

Այս համարում ընդգրկված են Հուսիկ Արայի, Վրեժ Իսրայելյանի, Ներսես Աթաբեկյանի, Հովհաննես Երանյանի և այլոց ստեղծագործությունները։

«Գրանիշ Offline»–ը վաճառվում է «Բյուրոկրատ» գրախանութում և «Արտբրիջ» գրախանութ–սրճարանում։