Լսողության խանգարում ունեցող երեխաների հատուկ կրթահամալիրը կվերափոխվի. «Փաստ»

«Փաստ» օրաթերթը գրում է.

ԿԳՄՍ նախարարությունն առաջարկում է վերանվանել «Լսողության խանգարում ունեցող երեխաների հատուկ կրթահամալիր» ՊՈԱԿ-ը և ստեղծել «Լսողության խանգարում ունեցող երեխաների հատուկ դպրոց - ռեսուրս կենտրոն» ՊՈԱԿ։ ԱԺ 2022 թվականի փետրվարի 9-ին ընդունած «Հանրակրթության մասին» օրենքում փոփոխություններ և լրացումներ կատարելու մասին» օրենքով, փոփոխություններ են կատարվել կրթության առանձնահատուկ պայմանների կարիք ունեցող երեխաների կրթության կազմակերպման գործընթացում: Մասնավորապես՝ օրենքում ամրագրվել է հատուկ դպրոց-ռեսուրս կենտրոն հաստատության տեսակը: Սա նկատի ունենալով՝ առաջարկվում է 2025-2026 ուսումնական տարում «Լսողության խանգարում ունեցող երեխաների հատուկ կրթահամալիր» ՊՈԱԿ-ը վերանվանել «Լսողության խանգարում ունեցող երեխաների հատուկ դպրոց - ռեսուրս կենտրոն» ՊՈԱԿ-ի:

«Լսողության խանգարում ունեցող երեխաների հատուկ կրթահամալիր» ՊՈԱԿ-ի գործունեության առարկան ու նպատակը կրթության առանձնահատուկ պայմանների կարիք ունեցող երեխաների կողմից հանրակրթական և հատուկ հանրակրթական ծրագրերի պարտադիր նվազագույնի յուրացման ապահովումն է և հանրակրթական բնույթի գործունեության իրականացումը: Կենտրոնի գործունեության առարկան կրթության առանձնահատուկ պայմանների կարիք ունեցող և մանկավարժահոգեբանական ծառայությունների 3-րդ և 4-րդ աստիճանի աջակցության կարիք ունեցող սովորողի կրթության կազմակերպումն է՝ հանրակրթական հիմնական և լրացուցիչ ծրագրեր իրականացնելու միջոցով, ինչպես նաև մանկավարժահոգեբանական աջակցության ծառայությունների տրամադրումն է այլ ուսումնական հաստատություններում սովորող՝ կենտրոնի ուղղվածությամբ կրթության առանձնահատուկ պայմանների կարիք ունեցող երեխաներին, նրանց ծնողներին և ուսումնական հաստատությունների մանկավարժներին։ Կենտրոնի գործունեության մյուս նպատակը կենտրոնում ընդգրկված յուրաքանչյուր սովորողի կրթության ապահովումն է՝ հաշվի առնելով հանրակրթական առարկայական չափորոշիչները և ծրագրերը, սովորողի տարիքային, ֆիզիոլոգիական և սոցիալ-հոգեբանական զարգացման առանձնահատկությունները, հետաքրքրությունները, ընդունակությունները, ինչպես նաև հանրակրթական հիմնական և լրացուցիչ ծրագրեր իրականացնող ուսումնական հաստատություններում ընդգրկված սովորողների կրթությանն աջակցումը՝ ըստ ռեսուրս կենտրոնի ուղղվածության:

Նախագծի ընդունմամբ ակնկալվում է կենտրոնում սովորող լսողության խանգարումներ ունեցող երեխաների կողմից հանրակրթական ծրագրերի պարտադիր նվազագույնի յուրացման ապահովումը և այլ ուսումնական հաստատություններում սովորող լսողության խանգարումներ ունեցող երեխաների հետ աշխատող մասնագետներին մանկավարժահոգեբանական աջակցության տրամադրումը՝ հանրակրթական ծրագրերի պարտադիր նվազագույնի յուրացումն ապահովելու համար: