Հայաստանը կկարողանա արտոնյալ պայմաններով Չինաստանից 700 տոննա ածխային էլեկտրոդներ ներմուծել

Եվրասիական միջկառավարական խորհուրդը Եվրասիական տնտեսական հանձնաժողովի կոլեգիային հանձնարարել է որոշում ընդունել Չինաստանի Ժողովրդական Հանրապետությունից ածխային էլեկտրոդների նկատմամբ հակադեմպինգային միջոց կիրառելու վերաբերյալ՝ սահմանելով տարեկան ներմուծման ծավալներ, որոնց շրջանակում հակադեմպինգային տուրքեր չեն գանձվի։

«Այդ ծավալները կկազմեն 700 տոննա Հայաստանի Հանրապետության համար, 1000 տոննա Բելառուսի Հանրապետության համար և 1000 տոննա Ղազախստանի Հանրապետության համար»,- պարզաբանել է ԵՏՄ առևտրի նախարար Անդրեյ Սլեպնևը։

Այս ապրանքների ներմուծումը, առանց հակադեմպինգային տուրքերի, Եվրասիական տնտեսական միության երկրների համար սահմանված տարեկան ծավալների շրջանակում, կթույլատրվի դրանց նպատակային օգտագործման հաստատումից հետո։

Ըստ հանձնարարականի՝ հարցը պետք է ԵՏՄ կոլեգիան վերանայի մինչև 2025 թվականի դեկտեմբերի 17-ը։