Տղամարդը հանգուցյալ մոր մահճակալին քնելուց հետո քիչ է մնացել՝ մահանա

Չինաստանի Չժեցզյան նահանգի բնակիչը ծանր հիվանդացել է և քիչ է մնացել՝ մահանա այն բանից հետո, երբ՝ քնել է հանգուցյալ մոր մահճակալին, գրում է South China Morning Post-ը։

Նշվում է, որ տղամարդը ապրում էր գյուղում իր 86-ամյա մոր հետ։ Աշնանը վերջինիս առողջությունը կտրուկ վատացել է, նրա մոտ սկսվել է փորլուծություն և սրտխառնոց։ Կինը  շուտով մահացել է։

Չժեցզյան նահանգի գյուղերում հավատում են, որ հարազատները պետք է 35 օր քնեն մահացածի մահճակալին՝ հանդերձյալ կյանք հոգու անվտանգ անցումն ապահովելու համար։ Տղամարդը հետևել է այս ավանդույթին և սկսել է քնել մոր մահճակալում։ Տասներորդ օրը նա սկսել է թուլություն զգալ և մկանային ցավեր ունենալ, որին հաջորդել են փորլուծությունը և փսխումները։

Հիվանդանոցում տղամարդու մոտ ախտորոշվել է տզերի միջոցով փոխանցվող վիրուս։ Բժիշկները կարծում են, որ տիզը կծել է նրա մորը, իսկ վիրուսը նրա օրգանիզմ է ներթափանցել տանը վարակված իրերի  միջոցով։

Բուժումից հետո տղամարդը սկսել է ապաքինվել։