Իրավիճակը շարունակում է լարված մնալ․ Զելենսկի

Ուկրաինայի նախագահ Վլադիմիր Զելենսկին հայտարարել է, որ երկրում ստեղծված իրավիճակը շարունակում է բարդ մնալ Ռուսաստանի կողմից իրականացված հարվածներից հետո։ Նրա խոսքով՝ վերջին հարձակումները զգալի վնաս են հասցրել քաղաքացիական ենթակառուցվածքներին, ինչի հետևանքով մի շարք շրջաններում խաթարվել են կենսական ծառայությունները։

Զելենսկին նշել է, որ արդեն երեկվանից պետական և արտակարգ ծառայությունները զբաղված են էլեկտրաէներգիայի, ջերմամատակարարման և ջրամատակարարման վերականգնման աշխատանքներով տարբեր մարզերում։ Սակայն, ըստ նրա, վերականգնման գործընթացը ժամանակ է պահանջում՝ հաշվի առնելով վնասների ծավալը։

Ուկրաինայի նախագահի փոխանցմամբ՝ ներկայումս հարյուր հազարավոր ընտանիքներ մնում են առանց էլեկտրականության Նիկոլաևի, Օդեսայի, Խերսոնի, Չեռնիգովի, Դոնեցկի, Սումիի և Դնեպրոպետրովսկի մարզերում։ Այդ շրջանները վերջին օրերին ենթարկվել են ինտենսիվ հարվածների։

Նա նաև հայտնել է, որ միայն վերջին մեկ շաբաթվա ընթացքում Ռուսաստանը Ուկրաինայի տարածքի ուղղությամբ կիրառել է ավելի քան 1500 հարվածային անօդաչու թռչող սարք, մոտ 900 կառավարվող ավիառումբ և 46 տարբեր տեսակի հրթիռ։