Կինը երկրորդ երեխային լույս աշխարհ է բերել առաջինի մահից 40 օր անց

ՌԴ Կալուգայում երկվորյակներով հղի կինը երկրորդ երեխային է ծննդաբերել առաջին երեխայի մահից 40 օր անց։ Բժիշկները նշում են, որ սա Ռուսաստանում առաջին նման դեպքն է առնվազն 20 տարվա ընթացքում։

Լրատվամիջոցների հաղորդագրությունների համաձայն՝ կնոջ անունը Նատալյա է։ Նա վաղաժամ սկսել է ծննդաբերել 24 շաբաթականում։ Արդյունքում, երեխաներից մեկը մահացել է։ Երկրորդ երեխային փրկելու համար բժիշկները որոշել են դադարեցնել ծննդաբերությունը։ Նատալյան 24-ժամյա հսկողության տակ է եղել և մեկ ամսից ավելի անցկացրել է հիվանդանոցում։

Արդյունքում, կինը հաջողությամբ ծննդաբերել է՝ լույս աշխարհ բերելով աղջկա։ Փոքրիկը կշռել է 1250 գրամ։ Նրան անվանել են Մաշա, նրա առողջական վիճակը լավ է։ Կալուգայի բժիշկները կարծում են, որ սա եզակի դեպք է: