Ալիևը պատրաստվում է մասշտաբային համաներման

Ադրբեջանական պետական APA գործակալությունը հայտնում է, որ նախագահ Իլհամ Ալիևը համաներում հայտարարելու նախաձեռնությամբ է հանդես եկել։ 

Համաներման մասին օրենքի նախագծի համաձայն՝ նախատեսվում է պատժից կամ քրեական պատասխանատվությունից ազատել «44-օրյա պատերազմում և 2023 թվականի սեպտեմբերի 19-20-ը Լեռնային Ղարաբաղում իրականացված գործողությունների  ինչպես նաև այդ գործողությունների ընթացքում զոհվածների կամ անհետ կորածների մերձավոր ազգականներին, քաղաքացիական բնակչության դեմ Հայաստանի ռազմական պատասխանի հետևանքով հաշմանդամ դարձած անձանց, ինչպես նաև կանանց, 60 տարեկանից բարձր անձանց, հանցագործության պահին անչափահասներին և այլոց։

Ավելին, նախագծի համաձայն, մի շարք անձինք, որոնք դատապարտվել են ազատազրկման լուրջ հանրային վտանգ չներկայացնող կամ ոչ այնքան ծանր հանցագործությունների համար, կազատվեն բանտից, կամ կկրճատվի նրանց պատժի չկրած մասը։

Ադրբեջանի նախագահի կողմից Միլլի Մեջլիս ներկայացված «Համաներման մասին» օրենքը, ենթադրաբար, կլինի ամենամեծ համաներումը կալանքից ազատ արձակված բանտարկյալների թվի առումով։ 

Այսպիսով, կանխատեսվում է, որ համաներումը կազդի ընդհանուր առմամբ ավելի քան 20․000 մարդու վրա: Կանխատեսվում է, որ ավելի քան 5000 կալանավոր կազատվի, ավելի քան 3000 դատապարտյալի պատիժը կմեղմացվի, ավելի քան 7000-ը կազատվի ազատության սահմանափակումներից և ավելի քան 1000 մարդ կազատվի քրեական պատասխանատվությունից: