13–ամյա աշակերտուհին ծանոթությունների կայքի միջոցով տղամարդ է փնտրել ուսուցչուհու համար

ՌԴ Նիժնի Տագիլում 13-ամյա աղջիկն ուսուցչուհու անունով գրանցվել է ծանոթությունների կայքում և սկսել է տղամարդ փնտրել։ Այս մասին հայտնել է Տագիլստրոյևսկի շրջանային դատարանի մամուլի ծառայությունը։

Դեպքը տեղի է ունեցել այս տարվա մարտին. դպրոցական աղջիկը Telegram մեսենջերում և ծանոթությունների կայքում ուսուցչուհու անունով կեղծ օգտահաշիվ է ստեղծել և տեղադրել նրա լուսանկարը, վիրավորական օգտանուն և հայտարարություն՝ մեկ գիշերով տղամարդ փնտրելու մասին։ Տեղեկությունը հասանելի է դարձել հարազատներին, գործընկերներին, աշակերտներին և նրանց ծնողներին՝ վնասելով ուսուցչուհու հեղինակությանը։

Քրեական գործ չի հարուցվել այն պատճառով, որ աղջիկը 14 տարեկանից փոքր է։ Ուսուցչուհին քաղաքացիական հայց է ներկայացրել զրպարտության համար, իսկ դպրոցական աղջկա մայրը դատարանում ընդունել է դստեր մեղքը և ներողություն խնդրել։

Դատարանը պարտավորեցրել է աշակերտուհու մորը ուսուցչուհուն վճարել 300,000 ռուբլի՝ որպես բարոյական վնասի փոխհատուցում։ Որոշումն ուժի մեջ չի մտել, քանի որ այն բողոքարկվել է պատասխանողի կողմից։