Գիտնականները պարզել են՝ COVID-19-ը կարող է հետևանքներ թողնել ուղեղի վրա

COVID-19-ը կարող է երկարատև փոփոխություններ թողնել ուղեղում նույնիսկ այն մարդկանց մոտ, ովքեր իրենց լիովին ապաքինված են համարում: Այս եզրակացությանն են հանգել Գրիֆիթի համալսարանի հետազոտողները, ովքեր օգտագործել են МРТ–ի ընդլայնված մեթդներ՝ հիվանդությունից ապաքինվածների և վիրուսով երբեք չվարակվածների ուղեղները ուսումնասիրելու համար: Ուսումնասիրությունը հրապարակվել է «Brain, Behavior, & Immunity – Health» (BBIH) ամսագրում:

Գիտնականները հայտնաբերել են տարբերություններ մոխրագույն և սպիտակ նյութի կառուցվածքում և ազդանշանում՝ հիշողության, մտածողության և ընդհանուր ճանաչողական առողջության համար պատասխանատու հատվածներում: Այս փոփոխությունները նկատվել են ոչ միայն COVID-ից հետո երկարատև ախտանիշներ ունեցող մարդկանց, այլև գանգատներ չունեցողների մոտ, ինչը ենթադրում է վարակի «լուռ» ազդեցություն:

Նշվում է, որ որքան ծանր են եղել կորոնավիրուսի ախտանիշները, այնքան ավելի նկատելի են ուղեղի հյուսվածքի փոփոխությունները: Սա կարող է մասամբ բացատրել կենտրոնացման, հիշողության և մտավոր դիմացկունության հետ կապված խնդիրները, որոնց մասին պացիենտները հայտնում են հիվանդությունից ամիսներ և տարիներ անց:

Հեղինակները ընդգծում են, որ COVID-19-ը ոչ միայն շնչառական վարակ է, այլև հիվանդություն, որը կարող է ազդել կենտրոնական նյարդային համակարգի վրա: