Ընտանիքն ավելի քան 100 փաթեթ է ստացել Amazon-ի առաքման սխալի պատճառով

Վաշինգտոնում բնակվող ընտանիքը բողոքել է Amazon-ի առաքման սխալներից. վերջին վեց ամիսների ընթացքում մոտակա հյուրանոցի համար նախատեսված ավելի քան 100 փաթեթ է հասցվել իրենց տուն, հաղորդում է UPI-ն։

Ըստ բնակչի, որը ներկայացել է միայն որպես Բրիթանի, փաթեթները նախատեսված են եղել Arlo հյուրանոցի հյուրերի համար, որը գտնվում է իր տնից մոտ մեկ կիլոմետր հեռավորության վրա։ Նա կասկածում է, որ պատվերներ տալիս հյուրանոցի հյուրերը սխալմամբ ընտրել են իր հասցեն, որը, ենթադրաբար, Amazon-ի տարբերակների ցանկում հայտնվում է հյուրանոցի հասցեից առաջ։

«Մեզ ամեն ինչ առաքել են՝ կատվի կերից և վիտամիններից մինչև սղոց», - ասել է Բրիթանին։

Եղել է դեպք, երբ հյուրանոցի հյուրը եկել է փաթեթը վերցնելու, բայց ընտանիքը հրաժարվել է շփվել կամ դուռը բացել։ Կինը բացատրել է, որ հասցեն հյուրանոցի հասցեից տարբերվում է ընդամենը մեկ տառով։ Սա, նրա կարծիքով, առաքման կրկնվող սխալների պատճառն է։

Իրավիճակը սրվում է անծանոթների ուշացած այցելությունների պատճառով. մարդիկ հաճախ փաթեթները վերցնում են ժամը 20:00-ից հետո, ինչը անհարմարություն է ստեղծում, հատկապես հաշվի առնելով, որ ընտանիքն ունի փոքր երեխա։

Amazon-ը հայտարարել է, որ տեղյակ է խնդրի մասին, հետաքննում է այն և աշխատում է այն լուծելու ուղղությամբ։