Ստրասբուրգում բացվեց Հայաստանի տեղական ինքնակառավարման համակարգի ձեւավորման 15-ամյակին նվիրված ցուցահանդես

Հայաստան 20 Հոկտեմբեր, 2011 4:43

Ստրասբուրգում այսօր բացվեց Հայաստանի տեղական ինքնակառավարման համակարգի ձեւավորման 15-ամյակին նվիրված լուսանկարների ցուցահանդես, որը կրում է «Հարուստ ավանդույթներով դեպի նոր նվաճումներ» խորագիրը:

Միջոցառումը կազմակերպվել է Եվրոպայի խորհրդի տեղական եւ տարածքային իշխանությունների կոնգրեսի 21-րդ նստաշրջանի շրջանակում:

Ըստ ՀՀ տարածքային կառավարման նախարարության մամլո հաղորդագրության, բացման խոսքով հանդես եկան ՀՀ փոխվարչապետ, տարածքային կառավարման նախարար Արմեն Գեւորգյանն ու Կոնգրեսի նախագահ Կիթ Ուիթմորը (Keith Whitmore): Վերջինս շնորհավորեց հայ ժողովրդին կարեւոր հոբելյանների համար' դարավոր պատմություն ու պատմամշակութային հարուստ ժառանգություն ունեցող ժողովրդին մաղթելով նոր նվաճումներ:

«Այս ցուցահանդեսը մի փոքր անդրադարձ է մեր երիտասարդ հանրապետության եւ նրա համայնքների պատմությանը: Փորձել ենք ներկայացնել մեր անցած ճանապարհի կարեւոր դրվագները, ինչպես նաեւ ծանոթացնել մեր պատմամշակութային հարուստ ժառանգությանը: Հայաստանը թեեւ քսանամյա հանրապետություն է, սակայն հայտնի է իր բազմադարյա մշակույթով, գեղեցիկ բնաշխարհով, քրիստոնեական հնագույն կոթողներով, որոնք նաեւ եվրոպական մշակութային ժառանգության մի մասն են»,- նշեց Ա. Գեւորգյանը:

Ցուցահանդեսը մեծ հետաքրքրություն առաջացրեց պատվիրակների շրջանակում: Լուսանկարների հեղինակը Մարտին Շահբազյանն է:

Օրվա երկրորդ կեսին Արմեն Գեւորգյանը ելույթով ( ելույթին հնարավոր է ծանոթանալ www.mta.gov.am կայքում) հանդես եկավ Եվրոպայի խորհրդի տեղական եւ տարածքային իշխանությունների կոնգրեսի լիագումար նիստում:

Երեկոյան Ա. Գեւորգյանը հանդիպեց ԵԽ-ում հավատարմագրված մի շարք դեսպանների հետ: Քննարկվեց Հայաստան-ԵԽ համագործակցության լայն շրջանակ, մասնավորապես անդրադարձ եղավ ԵԽ անդամ պետությունների հնարավոր աջակցությանը Հայաստան-ԵԽ գործակցությունից բխող ծրագրերի իրականացման գործում: