Հնդկաստանում երկու ընկեր հայտնաբերել են թանկարժեք հազվագյուտ կանաչ ադամանդ

Հնդկաստանում երկու ընկեր հայտնաբերել են հազվագյուտ, բարձրորակ կանաչ ադամանդ: Մասնագետները դրա արժեքը գնահատում են ավելի քան 50,000 դոլար, գրում է The Sun-ը։

Ադամանդը հայտնաբերել են 24-ամյա Սաթիշ Խաթիկը և 23-ամյա Սաջիդ Մոհամմեդը: Պաննան, որտեղ ապրում են ընկերները, հայտնի է ոչ միայն իր բարձր աղքատության մակարդակով, այլև ադամանդի  հանքավայրերով, և հենց այնտեղ էլ երիտասարդների բախտը բերել է: Քարը ներկայացվել է քաղաքային պաշտոնական գնահատողին, որը հաստատել է գտածոյի իսկությունը։

Գնահատող Անուպամ Սինգհի խոսքով՝ ադամանդը կշռում է 15.34 կարատ, և դրա որակը այն դասում է լավագույն բնական ադամանդների շարքին: Վերջնական գինը կախված կլինի դոլարի փոխարժեքի տատանումներից և Rapaport-ի կողմից տրամադրված չափանիշներից, որը համաշխարհային ադամանդի շուկայի հիմնական ինդեքսներից մեկն է:

Հնդկական օրենսդրության համաձայն, վարձակալված տարածքներում հայտնաբերված բոլոր ադամանդները պետք է հանձնվեն պետությանը և վաճառվեն պաշտոնական աճուրդներում: Այս աճուրդները կազմակերպվում են եռամսյակը մեկ Հնդկաստանի կառավարության կողմից և գրավում են գնորդներ ինչպես երկրի տարբեր ծայրերից, այնպես էլ արտասահմանից։