Ռուսաստանում դատարանը երկարաձգել է ադրբեջանական համայնքի անդամների նախնական կալանքը

Եկատերինբուրգի դատարանը երկարաձգել է աղմկահարույց սպանություններ կատարելու մեջ մեղադրվող ադրբեջանական համայնքի երեք անդամների նախնական կալանքը, հաղորդում է «Комсомольская правда»-ն։

Ազիզ Աբասովը, Շահին Լալաևը և Ախլիման Գյանջիևը մեղադրվում են Ռուսաստանի քրեական օրենսգրքի 33-րդ հոդվածի 3-րդ մասով և 105-րդ հոդվածի 2-րդ մասի «з» և «ж» կետերով. «մի խումբ անձանց կողմից նախնական դավադրությամբ կատարված սպանություն, պատվերով սպանություն, վարձու սպանության փորձ»։

Նախնական կալանքը երկարաձգվել է մինչև 2026 թվականի մարտի 29-ը։ Դատարանի որոշումը դեռևս օրինական ուժի մեջ չի մտել։ Կողմերը երեք օր ունեն այն բողոքարկելու համար, հաղորդել են Սվերդլովսկի մարզային դատարանի մամուլի ծառայությունից։

Հիշեցնենք, որ 2025 թվականի օգոստոսի 2-ին էթնիկ խմբավորման առաջնորդ Շահին Շիխլինսկին ձերբակալվել է և մեղադրվել է Ռուսաստանի քրեական օրենսգրքի երկու հոդվածներով։ Նա իրեն մեղավոր չի ճանաչել։ Նրա որդին՝ Մուտվալի Շիխլինսկին, ավելի վաղ ձերբակալվել էր Ազգային գվարդիայի սպայի վրա հարձակման համար։