Գործազուրկ հայրը գողացել է 180 կիլոգրամ ավոկադո՝ դրանք վաճառելու և իր երեխաների համար նվերներ գնելու համար

ԱՄՆ Ֆլորիդա նահանգի Մայամի-Դեյդ շրջանում ոստիկանությունը ձերբակալել է 29-ամյա մի տղամարդու, որը կասկածվում է մասնավոր ֆերմայից ավոկադոյի մեծ խմբաքանակ գողանալու մեջ: Շերիֆի գրասենյակի տվյալներով՝ խոսքը մոտ 180 կիլոգրամ մրգի գողության մասին է, հաղորդում է New York Post-ը։

Ոստիկանության հաղորդագրության համաձայն՝ Էդել Պերեսը Ռեդլենդ գյուղական տարածքում գտնվող ֆերմա է մտել ցանկապատի վրայի անցքով: Հետաքննիչները կարծում են, որ նա հարյուրավոր ավոկադոներ է հավաքել, դրանք տեղադրել տոպրակների մեջ և բարձել իր Mercedes-Benz-ի բեռնախցիկում։

Կասկածյալին ժամը 2:30-ի սահմաններում նկատել է շերիֆի տեղակալը: Ոստիկանը նկատել է ճանապարհին կայանված մեքենա՝ ավոկադոյի այգու մոտ, և տեսել է, թե ինչպես է սևազգեստ մի տղամարդ մրգեր հավաքում ծառերից և լցնում դրանք սև տոպրակները։

Կասկածյալից առգրավվել է ընդհանուր առմամբ մոտ 400 ֆունտ ավոկադո: Ոստիկանության տվյալներով՝ Պերեսը խոստովանել է, որ հասկացել է՝ իր գործողությունները անօրինական են, բայց պնդել է, որ երկու երեխաների գործազուրկ հայր է և մտադիր է եղել փողոցում ավոկադո վաճառել՝ նրանց համար սուրբծննդյան նվերներ գնելու համար։

Վերջիվերջո, տղամարդուն մեղադրանք է առաջադրվել երրորդ աստիճանի խոշոր գողության և ապօրինի մուտքի համար: Կասկածյալի ճակատագիրը կորոշի դատարանը: