Ղազախ գործարարը որոշել է իր ընկերության աշխատակիցների ծնողներին թոշակներ տալ

Գազավորված ըմպելիքներ արտադրող «Գալանզ Բոթլերս» ընկերության սեփականատեր Թուրսենգալի Ալագուզովը խոստացել է կենսաթոշակային հավելավճար վճարել իր աշխատակիցների ծնողներին: Գործարարի կինը՝ պրոդյուսեր և դերասանուհի Բայան Ալագուզովան, տեղեկությամբ կիսվել է Ինստագրամում։

Ալագուզովը առատաձեռն նվեր է մատուցել ոչ միայն ընկերության աշխատակիցներին, այլև նրանց ընտանիքի անդամներին: Կորպորատիվ միջոցառման ժամանակ նա հայտարարել է, որ նոր տարվանից սկսած  աշխատակիցների 65 տարեկանից բարձր ծնողները ամսական 50,000 տենգե հավելավճար կստանան։

Գործարարը որոշել է շնորհակալություն հայտնել տարեցներին՝ «ընկերության համար արժանի մարդ դաստիարակելու համար»։

Ալագուզովի կինը ամուսնու նախաձեռնության մասին գրառումը ուղեկցել է հետևյալ խոսքերով. «Ես հպարտ եմ քեզնով, իմ սեր»։ Ղազախական լրատվամիջոցների փոխանցմամբ՝ Ալագուզովը նախկինում իր աշխատակիցներին Ալմաթիում 100 բնակարան էր նվիրել՝ շնորհակալություն հայտնելով նրանց իր ընկերությունում երկարամյա ծառայության համար։

Լուրը բուռն քննարկումներ է առաջացրել սոցիալական ցանցերում: Օգտատերերի մեծ մասը ոգևորությամբ է ընդունել գործարարի առաջարկը՝ նշելով, որ մյուս ընկերությունները նույնպես պետք է կիրառեն այս մոտեցումը։