Մրայա Քերին 92 հազար դոլար փոխհատուցում կստանա իր հայտնի երգի գրագողության գործով

ԱՄՆ դատարանը պարտավորեցրել է երաժիշտներ Էնդի Սթոունին և Թրոյ Փաուերսին փոխհատուցում վճարել երգչուհի Մրայա Քերիին՝ նրա հայտնի All I Want for Christmas Is You երգի շուրջ գրագողության գործի շրջանակում. հայտնում է TMZ պորտալը՝ հղում անելով դատական փաստաթղթերին։

Սթոունը և Փաուերսը նախկինում պահանջում էին Քերիից 20 միլիոն դոլար՝ պնդելով, որ երգչուհու հանրահայտ ամանորյա երգը գրագողություն է իրենց հեղինակած ստեղծագործությունից, որը գրվել է Vince Vance & the Valiants խմբի համար և թողարկվել 1989 թվականին՝ Քերիի երգից հինգ տարի առաջ։

Դատարանում, սակայն, նշվել է, որ երկու երգերը էականորեն տարբերվում են միմյանցից, իսկ նմանությունը սահմանափակվում է միայն ամանորյա թեմատիկայով և նույն վերնագրով, որը հանդես է գալիս որպես կրկներգ։

Դեռևս մարտին Լոս Անջելեսի դատարանը մերժել էր կոմպոզիտորների հայցը՝ այն համարելով անհիմն։ Այժմ դատարանը նաև որոշել է, որ հայցվորները պետք է փոխհատուցում վճարեն Քերիին և գործով ներգրավված մյուս կողմերին։ Ընդհանուր գումարը կազմում է 110 հազար դոլար, որից 92 հազարը պետք է վճարվի Մրայա Քերիին։

All I Want for Christmas Is You երգը թողարկվել է 1994 թվականին։ Այն Քերին գրել է կոմպոզիտոր Ուոլթեր Աֆանասևի համահեղինակությամբ։ Երգը մեծ հաջողություն է ունեցել հենց թողարկման տարում, իսկ սթրիմինգային հարթակների տարածումից հետո ամեն տարի սուրբծննդյան նախաշեմին կրկին գլխավորում է արևմտյան երկրների հիթ-շքերթները։

2025 թվականի դեկտեմբերին երգը սահմանել է ռեկորդ՝ արդեն 21 շաբաթ գլխավորելով ԱՄՆ-ի Billboard Hot 100 հիթ-շքերթը։ Երգի հեղինակային իրավունքներից ստացվող եկամուտները գնահատվում են առնվազն 100 միլիոն դոլար։