Սիրելի՛ 1 մլն 600 հազար հայրենակիցնե՛ր, խնդրում ենք 2026 թվականի հունվարի 1-ից առողջապահական հիմնարկները չգրոհել. Փաշինյան

Կառավարության՝ դեկտեմբերի 25-ի նիստին առողջապահության նախարար Անահիտ Ավանեսյանը ներկայացրեց առողջության համընդհանուր ապահովագրական փաթեթը ձևավորելու, դրանում փոփոխություններ և լրացումներ իրականացնելու կարգը, դրանում ընդգրկված՝ հատուցման ենթակա (այդ թվում՝ համավճարով) բժշկական օգնության և սպասարկման ծառայությունների ցանկերը հաստատելու մասին որոշման նախագիծը:

Ըստ նախարարի՝ սահմանվել են նաև դեղորայքի ցանկերը, թե ինչից են քաղաքացիները կարողանալու օգտվել:

«Թե՛ ծառայությունների ցանկերը, թե՛ դեղորայքի ցանկերը հրապարակված են: Ուզում եմ ասել, որ ԱՐՄԵԴ հավելվածն արդեն իսկ թարմացված տարբերակով առկա է: Խնդրում եմ, որ մեր քաղաքացիներն այն ներբեռնեն, որպեսզի տեղեկացված լինեն իրենց կարգավիճակի մասին: Եթե այսօր էլ ներբեռնեք, կտեսնեք, որ դուք ունենք 2026 թվականին ապահովագրված կարգավիճակ, և փաթեթը հենց հունվարի 1-ից կակտիվանա»,- ասաց նա:

Վարչապետ Նիկոլ Փաշինյանը ճշտեց՝ այս որոշումների փաթեթի ընդունմամբ 2026 թվականի հունվարի 1-ից առողջության համընդհանուր ապահովագրության համակարգը մտնում է ուժի մե՞ջ: Ավանեսյանը հաստատեց:

Նիստի ժամանակ կրկին ներկայացվեցին այն խմբերը, որոնք առաջին փուլով են ընդգրկվելու առողջության համընդհանուր ապահովագրության համակարգում: Ըստ այդմ՝ այդ խմբերն են մինչև 18 տարեկանները, 65+ տարեկանները, 200 հազար դրամից ավելի ստացողները, հաշմանդամության կարգ ունեցողները, սոցիալական անապահովության համակարգում ընդգրկվածները, զոհված զինծառայողների ընտանիքները: Այս խմբերը ընդհանուր ներառում են 1 մլն 6 հազար մարդու:

Նիկոլ Փաշինյանը դիմեց հանրությանը 2 հարցով. «Առաջինը. սիրելի՛ 1 մլն 600 հազար հայրենակիցնե՛ր, խնդրում ենք 2026 թվականի հունվարի 1-ից առողջապահական հիմնարկները չգրոհել, որովհետև գրոհը հիվանդության մասին չէ, հիվանդանալ-չհիվանդանալու մասին չէ»:

Ըստ Փաշինյանի՝ բացառված է, որ ցանկացած մարդ չգտնի մի բան, որը բուժելու անհրաժեշտություն ունի, և առողջության համակարգի նպատակն է հենց ստուգումների արդյունքում բացահայտել և կանխել հիվանդությունը, որպեսզի ամեն հաջորդ փուլում այդ խնդրին առնչվելիս պետական ծախսն էլ չավելանա:

«Էլի եմ ասում, պետք չէ հունվարի 1-ից գրոհ ձեռնարկել առողջապահական համակարգի վրա, որովհետև ո՛չ բժշկական կենտրոններն են փախչելու, ո՛չ Կառավարությունն է փախչելու, ո՛չ պոլիկլինիկաները, և պետք է կառավարել»,- ասաց նա:

Երկրորդ խնդիրը, ըստ Փաշինյանի, այն է, որ ցանկացած բարեփոխում մինչ չհանդիպի իր պրոբլեմին, կենդանություն չի ստանալու: Այս համատեքստում Փաշինյանը զգուշացրեց՝ լինելու են խնդիրներ՝ աշխատանքային, կազմակերպչական, տեխնիկական և այլն, սոցիալական ցանցերում ևս, մեծ հավանականությամբ, կլինեն «փոթորիկներ», բայց դա, ըստ Փաշինյանի, այնուամենայնիվ, ապոկալիպսիս չէ, դրանից երկիրը չի կործանվում, աշխարհը չի քանդվում, կյանքն էլ չի ավարտվում. «Այսինքն՝ համակարգ ենք ներդնում, և համակարգն ինքն էլ պետք է ադապտացվի, և ադապտացվելու է որոշակի սխալների և բացթողումների արդյունքում»:

Փաշինյանը նաև տեղեկացրեց, որ Կառավարությունը և առողջապահության նախարարությունը, մասնավորապես, համակարգի գործարկումից հետո, կաշխատեն արտակարգ ռեժիմով: Ե՛վ կառավարության, և՛ նախարարության մակարդակով օպերատիվ խմբեր են ձևավորվել: Ավելին՝ հունվարի 5-ին առողջապահության նախարարությունում կամփոփվեն 2025 թվականի առաջնահերթությունների կատարման արդյունքները:

«Ի՞նչն է մեր հիմնական ուղերձը. որ մենք սովորական վերաբերվենք: Սա սև ուրբաթ չէ, առողջապահության համակարգի սև ուրբաթ չէ, որ հունվարի 5-ին ինչ հասցրինք առնել, առնենք, որ հետո չի լինելու: Սա լինելու է միշտ: Քովիդի ժամանակից այդ բառը սովորել եմ, մենք պետք է նախ մեզ «տրիաժ» անենք, հետո առողջապահական համակարգը տրիաժ անի… Այսինքն՝ այն հին ժամանակներում մենք ոնց ենք վերաբերվել, ասել ենք՝ դե լավ, դե, այսինքն՝ մինչև դանակը ոսկորին չի հասել, մենք բժշկի չենք դիմել. դա վատ է: Բայց հիմա դանակը 1 կմ հեռավորության վրա պետք չէ բժշկի դիմել: Պետք է հանդարտ պայմաններում թողնել, որ համակարգը ծնվի, սկսի փխրուն քայլերով գնալ առաջ, պնդանա, կայանա և այլն»,- ասաց նա: