Ռուսաստանը 9 միլիարդ դոլար է հատկացրել Թուրքիային

Թուրքիայի էներգետիկայի նախարարը հայտարարել է, որ Ռուսաստանը լրացուցիչ 9 միլիարդ դոլար է հատկացրել «Ռոսատոմ»-ի «Աքքույու» ատոմակայանի կառուցումն ավարտին հասցնելու համար։ Նա նշել է, որ Անկարան ակնկալում է ատոմակայանը շահագործման հանձնել 2026 թվականին։

Հիշեցնենք, որ «Ռոսատոմը» 2010 թվականի համաձայնագրի համաձայն կառուցում է Թուրքիայի առաջին ատոմակայանը Մերսին նահանգի Աքքույու քաղաքում: Նախագծի ընդհանուր արժեքը կազմում է 20 միլիարդ դոլար, և նախկինում նախատեսվում էր, որ կայանը շահագործման կհանձնվի այս տարի, սակայն ժամկետը երկարաձգվել է։

Բայրաքթարը նշել է, որ հատկացված միջոցները, հավանաբար, կօգտագործվեն 2026-2027 թվականների միջև ընկած ժամանակահատվածում: 2026 թվականի համար նախատեսվում է առնվազն 4-5 միլիարդ դոլարի արտասահմանյան ներդրումներ, ասել է նա Ստամբուլում կայացած ճեպազրույցի ժամանակ։

Նախարարը նաև հայտարարել է, որ Թուրքիան բանակցություններ է վարում Հարավային Կորեայի, Չինաստանի, Ռուսաստանի և Միացյալ Նահանգների հետ՝ Սինոփ նահանգում և Թրակիայի շրջանում միջուկային նախագծեր իրականացնելու համար: Նա ընդգծել է, որ Անկարան փնտրում է շահավետ առաջարկներ։

Բայրաքթարը հայտարարել է, որ Թուրքիան մտադիր է զարգացնել իր սեփական ատոմային էներգետիկայի ոլորտը և տրամադրել կոնկրետ տվյալներ իր նպատակների վերաբերյալ։