«Սենատի ընդունած օրենքը Հայաստանի համար 3 կգ-անոց ազդեցություն ունեցավ». Ռիչարդ Կիրակոսյան

Այսօր՝ հունվարի 26-ին, լրագրողների հետ հանդիպումը «Տարածաշրջանային հետազոտությունների կենտրոնի» տնօրեն Ռիչարդ Կիրակոսյանն սկսեց հումորային մեկնաբանությամբ, թե Ֆրանսիայի Սենատի կողմից ընդունված՝ ցեղասպանությունների ժխտումը քրեականացնող օրինագիծը Հայաստանի վրա ունեցավ 3 կգ-անոց ազդեցություն՝ Հայաստանում ծնվեց առաջին Սարկոզին։ Փորձագետը նկատի ուներ երեկ Գյումրիում ծնված փոքրիկին, որին ծնողներն անվանակոչել էին ի պատիվ Ֆրանսիայի նախագահի։ Կիրակոսյանի խոսքերով՝ դա ցույց է տալիս Սենատի այդ որոշման կարևորությունը Հայաստանի համար։

Հումորային բացման խոսքից հետո Կիրակոսյանն անցավ ավելի լուրջ դատողությունների՝ օրինագծի ընդունումը՝ որպես Թուրքիային ուղղված ուժեղ մեսիջ որակելով։ «Սա մեսիջ էր Թուրքիային, որ Հայոց ցեղասպանության ճանաչման շաժումը միջազգային է, և այն հնարավոր չէ կանգնեցնել»,- ասաց փորձագետը։

Կիրակոսյանը խոսեց նաև այն մասին, որ պաշտոնական Թուրքիայի նման արձագանքը Սենատի որոշմանն ավելի է ակտիվացնում Հայոց ցեղասպանության մասին խոսակցությունները։  

Նրա խոսքերով՝ մի քանի ուղղությամբ զարգացումներ են սկսվել, որոնցից մեկն էլ այն է, որ այժմ Թուրքիան ստիպված է իր հայացքն ուղղել դեպի արևելք, քանի որ Ֆրանսիայի այս որոշումը շատ լավ առիթ էր՝ փչացնելու Թուրքիա-Եվրամիություն հարաբերություններն ու վնասելու Թուրքիայի՝ ԵՄ անդամակցության գործընթացին։ «Թուրքիան այժմ ավելի շատ պիտի նայի արևելք, օրինակ՝ վերադառնա ֆուտբոլային դիվանագիտությանն ու հարաբերությունների կարգավորմանը»,- ասաց Կիրակոսյանը։

Բանախոսը կարևորեց նաև հանգամանքը, որ օրինագծի ընդունումը տեղի ունեցավ Դինքի սպանության տարելիցից օրեր անց։ Այս հանգամանքը ևս նա որակեց որպես Ֆրանսիայի կողմից ճնշում Թուրքիայի վրա։ «Սա ցույց կտա, թե ինչպես կփոխվի Թուրքիան»,-ասաց նա։