Սոմալին պահանջում է, որ Իսրայելը չեղարկի Սոմալիլենդի ճանաչումը

Սոմալին պահանջել է, որ Իսրայելը հետ վերցնի Սոմալիլենդի՝ անջատված տարածաշրջանի ճանաչման որոշումը՝ այն որակելով որպես պետական ինքնիշխանության դեմ ուղղված ագրեսիա։ Սոմալիի արտաքին գործերի պետական նախարար Ալի Օմարը Al Jazeera-ին հայտարարել է, որ կառավարությունը կօգտագործի բոլոր դիվանագիտական միջոցները՝ վիճարկելու Իսրայելի քայլը, որը, նրա խոսքով, միջամտություն է երկրի ներքին գործերին և միջազգային իրավունքի խախտում։

Սուր արձագանքը հաջորդել է այն հայտարարությանը, ըստ որի Իսրայելը դարձել է աշխարհում առաջին պետությունը, որը պաշտոնապես ճանաչել է Սոմալիլենդը։ Քայլը քննադատության է արժանացել աֆրիկյան և արաբական մի շարք երկրների կողմից։ Սոմալիի իշխանությունները պնդում են, որ Սոմալիլենդը մնում է երկրի անբաժանելի մասը՝ չնայած այն փաստին, որ տարածաշրջանը 1991 թվականին հայտարարել է անկախություն և ունի սեփական կառավարման համակարգ, բայց երբևէ չի ճանաչվել ՄԱԿ-ի անդամ պետությունների կողմից։

Օմարը նաև նշել է, որ Իսրայելի որոշման շարժառիթներից մեկը կարող է լինել Գազայից պաղեստինցիների հնարավոր հարկադիր տեղահանման հարցը՝ ընդգծելով, որ այդ թեման վաղուց է շրջանառվում տարածաշրջանային քննարկումներում։ Սոմալիի դիրքորոշումը պաշտպանել են նաև Պաղեստինի իշխանությունները, ինչպես նաև Աֆրիկյան միությունն ու Արաբական լիգան՝ զգուշացնելով, որ նման ճանաչումը վտանգավոր նախադեպ կարող է ստեղծել և խախտել սահմանների անխախտելիության հիմնարար սկզբունքը