Նարկոլոգը բացահայտել է ալկոհոլի կանոնավոր օգտագործման վտանգավոր հետևանքները

Նարկոլոգ, հոգեբույժ Ռաֆայել Խակիմզանովը հայտնել է, որ գիտականորեն ապացուցված է՝ ալկոհոլը հանդիսանում է ուժեղ քաղցկեղածին նյութ։ Նրա խոսքով՝ ալկոհոլի բաղադրիչ էթանոլը օրգանիզմում քայքայվելիս վերածվում է ացետալդեհիդի՝ չափազանց թունավոր նյութի, որը վնասում է բջիջների ԴՆԹ-ն և մեծացնում քաղցկեղի զարգացման հավանականությունը։

Բժիշկը պարզաբանել է, որ ԴՆԹ-ի վնասումը նշանակում է օրգանիզմի «կառուցման հրահանգների» խախտում, իսկ նման խանգարումների կուտակումը կարող է հանգեցնել բջիջների մուտացիաների և անվերահսկելի բաժանման։ Բացի այդ, ալկոհոլի կանոնավոր օգտագործումը հանգեցնում է հակաօքսիդանտ վիտամինների՝ ֆոլաթթվի, A, C, E և B խմբի վիտամինների պակասի, որոնք կարևոր դեր ունեն ԴՆԹ-ի պաշտպանությունում։

Խակիմզանովի խոսքով՝ ալկոհոլի վերամշակման ընթացքում օրգանիզմում առաջանում են նաև ազատ ռադիկալներ, որոնք վնասում են բջիջները և ստեղծում բարենպաստ պայմաններ չարորակ ուռուցքների առաջացման համար։ Նա ընդգծել է, որ ապացուցված է ալկոհոլի և առնվազն յոթ տեսակի քաղցկեղի՝ բերանի խոռոչի, կոկորդի, կերակրափողի, լյարդի, հաստ և ուղիղ աղու, ինչպես նաև կրծքագեղձի քաղցկեղի միջև ուղիղ կապը։