Մոսկվայի օդանավակայաններում հետաձգվել է ավելի քան 50 չվերթ

Մոսկվայի Վնուկովո և Շերեմետևո օդանավակայաններում սահմանված ժամանակավոր սահմանափակումների ֆոնին ժամանումների և մեկնումների ավելի քան 50 չվերթ է հետաձգվել։ Տեղեկությունը փոխանցում է РИА Новости-ն՝ հղում անելով օդանավակայանների առցանց ցուցատախտակների տվյալներին։

Հաղորդվում է, որ 24 ինքնաթիռ ուղարկվել է պահուստային օդանավակայաններ, իսկ ավելի քան 10 չվերթ ամբողջությամբ չեղարկվել է։ Հետաձգված և վերահասցեագրված թռիչքների հիմնական մասը բաժին է ընկնում Վնուկովոյին, որը ժամանակավորապես ամբողջությամբ փակ է ինչպես ժամանումների, այնպես էլ մեկնումների համար։

Շերեմետևո օդանավակայանում թռիչքները կատարվում են պետական մարմինների հետ համաձայնեցմամբ։ Այստեղ նույնպես արձանագրվել են զգալի թվով ուշացումներ, սակայն դրանց մեծ մասը չի գերազանցում երկու ժամը։ Ավելի վաղ Ռոսավիացիան նախազգուշացրել էր Վնուկովո և Շերեմետևո օդանավակայաններում թռիչքների ժամանակավոր սահմանափակումների մասին՝ անվտանգության նկատառումներով։