Ռուսաստանում երկու տարվա ընթացքում կհայտնվի քաղցկեղի արագ հայտնաբերման թեստ

Ռուսաստանում մշակվում է նորարարական թեստ-համակարգ, որը թույլ կտա արագ հայտնաբերել օնկոլոգիական հիվանդությունները։ Այդ մասին հայտնել է Հեռավոր Արևելքի դաշնային համալսարանի Առաջատար ինժեներական դպրոցի տնօրեն Լյուդմիլա Տեկությևան՝ նշելով, որ նախագիծը կյանքի կկոչվի մոտ երկու տարվա ընթացքում։

Նրա խոսքով՝ կազմակերպության լաբորատորիաներում աշխատում են ֆերմենտային էքսպրես թեստի ստեղծման վրա։ Գիտնականները հայտնաբերել են եզակի ծովային միկրոօրգանիզմներ, որոնք կարող են արդյունավետ կիրառվել քաղցկեղի արագ ախտորոշման համար։ Ներկայում ընթանում են նախակլինիկական փորձարկումներ, որոնք նախատեսվում է ավարտել առաջիկա երկու տարում։

Տեկությևան հավելել է, որ արդեն մշակվել է ֆերմենտների սինթեզի տեխնոլոգիա կենսառեակտորներում, ինչի հիման վրա ձևավորվում է ամբողջական արտադրական շղթա՝ միկրոօրգանիզմների աճեցումից մինչև ֆերմենտների մաքրում և առանձնացում։ Այս փուլում աշխատանքները տեղափոխվել են հենց թեստ-համակարգի ստեղծման փուլ, որը նախատեսվում է կիրառել արագ և մատչելի ախտորոշման համար։