«Ոչ մի անեքսիա». Գրենլանդիան արձագանքել է Թրամփի հայտարարություններին
Համաշխարհային Մամուլ
Գրենլանդիայի վարչապետ Յենս-Ֆրեդերիկ Նիլսենը հայտարարել է, որ Գրենլանդիան բաց է ԱՄՆ-ի հետ երկխոսության համար, սակայն միայն հարգալից ձևաչափով և առանց անեքսիայի սպառնալիքների։ Այս մասին նա գրել է Facebook սոցիալական ցանցում՝ արձագանքելով ԱՄՆ նախագահ Դոնալդ Թրամփի հայտարարություններին, փոխանցում է ՌԻԱ Նովոստին։
Նիլսենի խոսքով՝ շփումը պետք է իրականացվի պաշտոնական դիվանագիտական ուղիներով և միջազգային իրավունքի հարգմամբ, այլ ոչ պատահական ու անհարգալից գրառումներով սոցիալական ցանցերում։ Նա քննադատել է նաև Սպիտակ տան վարչակազմի ղեկավարի տեղակալ Սթիվեն Միլլերի կնոջ՝ Քեթի Միլլերի հրապարակումը, որտեղ Գրենլանդիան պատկերված էր ԱՄՆ դրոշի գույներով և ուղեկցվում էր «շուտով» գրությամբ։ Վարչապետը շեշտել է, որ Գրենլանդիան պատմականորեն ԱՄՆ-ի բարեկամն է եղել, սակայն ընկերությունը չի կարող հիմնվել տարածքային հավակնությունների վրա։
Նիլսենը անընդունելի է համարել նաև Թրամփի այն ձևակերպումը, ըստ որի «ԱՄՆ-ին պետք է Գրենլանդիան», հատկապես՝ այն կապելով Վենեսուելայում ԱՄՆ ռազմական միջամտության հետ։ «Այլևս ոչ մի ֆանտազիա անեքսիայի մասին», — ընդգծել է վարչապետը՝ կոչ անելով Վաշինգտոնին վերանայել իր հռետորաբանությունը։ Միևնույն ժամանակ ԱՄՆ-ի կողմից նշանակված հատուկ բանագնացը Գրենլանդիայում՝ Ջեֆ Լանդրին, վստահեցրել է, որ Վաշինգտոնը չի ծրագրում կղզու տարածքային գրավում։
ՈՒՂԻՂ ԵԹԵՐ
Ամենադիտված 
Մարտի 20-ին կդադարեցվի ջրամատակարարումը. հասցեներ
