Պետրոն Թրամփին զգուշացրել է «ժողովրդական զայրույթի» մասին՝ Կոլումբիա ներխուժման դեպքում

Կոլումբիայի նախագահ Գուստավո Պետրոն հայտարարել է, որ ԱՄՆ նախագահ Դոնալդ Թրամփը կբախվի «ժողովրդական զայրույթի», եթե Կոլումբիա ներխուժի՝ դա հիմնավորելով թմրանյութերի դեմ պայքարով։ Այս մասին Պետրոն գրել է X սոցիալական հարթակում՝ կտրականապես մերժելով իր հասցեին հնչող մեղադրանքները։

Պետրոյի խոսքով՝ ինքը որևէ կապ չունի թմրանյութերի շրջանառության հետ, իսկ իր միակ սեփականությունը ընտանեկան տունն է, որի վարկը շարունակում է մարել աշխատավարձից։ Նա ընդգծել է, որ իր բանկային հաշիվների տվյալները հրապարակված են, և որևէ մեկը չի կարող պնդել, թե նա ծախսել է ավելին, քան իր պաշտոնական եկամուտն է թույլ տալիս։

Կոլումբիայի նախագահը հավելել է, որ վստահում է սեփական ժողովրդին և, իր հնարավոր ձերբակալության դեպքում, ակնկալում է հանրային դիմադրություն՝ ընդգծելով, որ շարունակում է մնալ հանրության կողմից աջակցվող ղեկավար։ Ավելի վաղ Թրամփը նախազգուշացրել էր Պետրոյին՝ հայտարարելով, թե Կոլումբիայում արտադրվող կոկաինը մատակարարվում է ԱՄՆ, և կոչ էր արել նրան «զգույշ լինել»։