Սուրբ Ծննդյան օրը, լարված իրավիճակ, Թալինի եկեղեցում․ համայնքապետը հայտարարեց՝ «Տեր Հայկը չի մտնելու եկեղեցի»

Լույսը դեռ չբացված՝ Սուրբ Ծննդյան օրը, Թալինի Սուրբ Աստվածածին եկեղեցում լարված իրավիճակ է ստեղծվել։ ՆԳՆ-ի անմիջական մասնակցությամբ ոստիկանությունը փակել է Թալինի Սուրբ Աստվածածին եկեղեցու մուտքը։ Թալինի ՔՊ-ական համայնքապետ Տավրոս Սափեյանի ուղիղ մասնակցությամբ և ցուցումով ոստիկանները թույլ չեն տվել օրինական, օծյալ քահանա Տեր Հայկ քահանա Սահակյանին մուտք գործել եկեղեցի և մատուցել Սուրբ Ծննդյան պատարագը։

Եկեղեցին շրջափակվել է ոստիկաններով՝ փաստացի վերածվելով ուժային կառույցների վերահսկողության տակ գտնվող տարածքի։ Ավելի վաղ Թալինի համայնքապետ Տավրոս Սափեյանը նշել էր, որ Սուրբ Ծննդյան պատարագը եկեղեցում պետք է մատուցի կարգալույծ եղած քահանա Տեր Թադեն, որն այժմ հանդես է գալիս իր աշխարհիկ՝ Արամայիս Թախմազյան անունով։

Համայնքապետ Տավրոս Սափեյանը հրապարակավ հայտարարել է, որ թույլ չեն տալու Տեր Հայկին եկեղեցի մտնել՝ փաստացի իրեն վերապահելով եկեղեցու տնօրինման իրավունքը։ Նրա խոսքով՝ «ամենայն հարգանքով Տեր Հայկի նկատմամբ՝ նա չի մտնելու եկեղեցի», քանի որ Սուրբ Ծննդյան պատարագը պետք է անցկացնի կարգալույծ քահանա Արամայիս Թախմազյանը։

Երկարատև լարվածությունից և հնարավոր բախումներից խուսափելու նպատակով Տեր Հայկ քահանա Սահակյանը որոշում է կայացրել իր հոտի հետ միասին շարժվել դեպի Մաստարայի եկեղեցի՝ թույլ չտալու համար սադրանքներ և արյունահեղություն։

Սաղմոսավանքի հոգևոր հովիվ Տեր Փառեն քահանա Առաքելյանի խոսքով՝ եկեղեցու ավանդույթի համաձայն, տաղավար տոներին պատարագը պետք է մատուցի տվյալ եկեղեցու հոգևոր հովիվը, սակայն այդ կարգը խախտվել է։ Նշենք, որ սա առաջին նման դեպքը չէ․ դեկտեմբերի 31-ի գիշերը ևս, Տավրոս Սափեյանի մասնակցությամբ, խոչընդոտվել էր եկեղեցում պատարագի անցկացումը։