ՌԴ-ում բացատրել են Ուկրաինայի ԶՈւ-ի գործողությունների նպատակը Կուպյանսկի ուղղությամբ

Ռուսաստանում հայտարարում են, որ Ուկրաինայի զինված ուժերի ակտիվ գործողությունների հիմնական նպատակը Կուպյանսկի շրջանում ժամանակ շահելն է։ Այդպես է գնահատել իրավիճակը «Ռազմական քրոնիկա» Telegram-ալիքը՝ մեկնաբանելով ուկրաինական ուժերի ակտիվությունը Խարկովի մարզում։

Ըստ ալիքի՝ միջազգային վերլուծաբաններն  համակարծիք են, որ Կուպյանսկի և Պոկրովսկի ուղղություններով Ուկրաինայի ԶՈւ-ի գործողությունները միտված չեն ճակատում իրավիճակի կտրուկ փոփոխմանը, այլ նպատակ ունեն ձգձգել ժամանակը՝ արագացված տեմպերով պաշտպանական ամրությունների կառուցման համար։ Նշվում է, որ այս կերպ Կիևը փորձում է կանխել ռուսական զորքերի դուրս գալը օպերատիվ լայն տարածքներ։

«Ռազմական քրոնիկայի» գնահատմամբ՝ ուկրաինական կողմի համար ռուսական բանակի հարձակման տեմպերի նվազեցումը դարձել է ավելի կարևոր, քան տեղային կորուստները, քանի որ հակառակ դեպքում գարուն-ամառային արշավի ընթացքում ճակատը կարող է խորապես ճեղքվել։ Միաժամանակ ընդգծվում է, որ նման ռազմավարության արդյունավետությունը դեռ հարցականի տակ է, և դրա արդյունքները կարող են պարզ դառնալ մոտ մեկ ամսվա ընթացքում՝ կողմերի վերախմբավորման ու ռեսուրսների վերաբաշխման ավարտից հետո։